গুৱাহাটী,৬ অক্টোবৰ :অসমৰ চুবুৰীয়া ৰাজ্য মেঘালয় যেন হৈ পৰিছে নিষিদ্ধ ড্ৰাগছ আৰু চোৰাং কাৰবাৰৰ কৰিডৰ ৷ মেঘালয় ৰিভয় জিলাত ৰাজপথৰ আকস্মিক গোপন অভিযানত বৃহস্পতিবাৰৰ নিশা প্ৰায় ৩ কোটি টকা মূল্যৰ হেৰ’ইন জব্দ কৰাৰ লগতে চোৰাংকৈ সৰবৰাহ কৰা সোণৰ বিস্কুট জব্দ কৰিবলৈ সক্ষম হৈছে মেঘালয় আৰক্ষী । শুকুৰবাৰৰ পুৱতি নিশা মেঘালয় আৰক্ষীয়ে গুৱাহাটীৰ সমীপৰ নংপোত এখন যাত্ৰীবাহী বাছত তালাচী চলাই বুজন পৰিমাণৰ হেৰ’ইন উদ্ধাৰ কৰে ।
প্ৰাথমিক খবৰ অনুসৰি, মেঘালয়ৰ ৰিভয় জিলাৰ নংপোত থকা নাকা পহৰা চকীত AS 24 AC 1152 নম্বৰৰ শিলচৰৰ পৰা গুৱাহাটী অভিমুখী এখন নৈশ সেৱা বাছত মেঘালয় আৰক্ষীয়ে গোপন খবৰৰ ভিত্তিত তালাচী চলায়। আৰক্ষীৰ হাতত হেৰ’ইন সৰবৰাহৰ নিৰ্দিষ্ট চোৰাংচোৱা তথ্য আছিল যাৰ ভিত্তিত কটকটীয়া তালাচী অভিযান চলাইছিল কেইবাখনো বাছত ৷ মেঘালয় আৰক্ষীৰ তথ্য মতে, অভিযান কালত হেৰ’ইন ভৰ্তি ৩০টা চাবোনৰ কেচ উদ্ধাৰ কৰি জব্দ কৰা হয় । জব্দ কৰা হেৰ’ইনখিনিৰ মুঠ ওজন আছিল প্ৰায় ৯২১ গ্ৰাম ।
আন্তঃৰাষ্ট্ৰীয় অবৈধ মাদক দ্ৰব্যৰ বজাৰত জব্দ হোৱা হেৰ’ইনৰ মূল্য প্ৰায় ৯ কোটি টকা বুলি মেঘালয় আৰক্ষীয়ে অনুমান কৰিছে । ইফালে যাত্ৰীবাহী বাছখনৰ চালক আৰু সহযোগী চালকৰ লগতে এজন কুখ্যাত আন্তঃৰাজ্যিক ড্ৰাগছ সৰবৰাহকাৰীকে ধৰি মুঠ ৩ জন লোকক নিচাজাতীয় ড্ৰাগছ সৰবৰাহৰ অভিযোগত গ্ৰেপ্তাৰ কৰা হয় । এই প্ৰসংগত মেঘালয়ৰ মুখ্যমন্ত্ৰী কনৰাড কে চাংমাই সামাজিক মাধ্যম এক্সত তথ্য সদৰী কৰিছে ।