যোৰহাট,5 আগষ্ট:আজি অসমৰ প্ৰথম গৰাকী মুখ্যমন্ত্ৰী লোকপ্ৰিয় গোপীনাথ বৰদলৈৰ পৱিত্ৰ পুণ্যতিথি ৷ অসমৰ প্ৰথম গৰাকী মুখ্যমন্ত্ৰীৰ পৱিত্ৰ পুণ্যতিথি লগত সংগতি ৰাখি অসম চৰকাৰে আয়োজন কৰিছিল লোক কল্যাণ দিৱস ৷ শনিবাৰে কলাক্ষেত্ৰত অসম চৰকাৰ উদ্যোগত অনুষ্ঠিত হৈছিল এই বাৰ লোক কল্যাণ দিৱস ৷ গুৱাহাটীৰ লগতে ৰাজ্যৰ বিভিন্ন প্ৰান্তত পালন কৰা হৈছে লোক কল্যাণ দিৱস ৷ 'ভাৰতৰত্ন' সন্মানেৰে সন্মানিত গোপীনাথ বৰদলৈৰ প্ৰতি সন্মান আৰু শ্ৰদ্ধা জনাই সমগ্ৰ ৰাজ্য লগতে যোৰহাট থিয়েটাৰ হলত যোৰহাট জিলা প্ৰশাসন উদ্যোগত লোক কল্যাণ দিৱসৰ আয়োজন কৰা হয় । এই অনুষ্ঠানতে যোৰহাটৰ দুগৰাকী চৰকাৰী কৰ্মচাৰীক ৰাজ্য চৰকাৰে আগৱঢ়োৱা লোকসেৱা পুৰস্কাৰৰে সন্মানিত কৰা হয় ৷
যোৰহাট আয়ুক্ত কাৰ্যালয়ৰ কনিষ্ঠ সহায়ক ৰন্টু নেওগ আৰু যোৰহাট চিকিৎসা মহাবিদ্যালয় উচ্চ বৰ্গ সহায়ক মহেন্দ্ৰ কন্দলী পাঠকক সম্বৰ্ধনা জনোৱা হয় । আনহাতে যোৰহাট জিলা আয়ুক্ত পুলক মহন্তক কৰ্মশ্ৰী বঁটাৰে সন্মানিত কৰে ৰাজ্য চৰকাৰে । তাৎপৰ্যপূৰ্ণ যে মাজুলীত উপায়ুক্ত হিচাপে কাৰ্যনিৰ্বাহ কৰি থকা সময়ত মাজুলীক লৈ কৰা বিভিন্ন পৰিকল্পনা আৰু কৰ্মদক্ষতাৰ বাবে মহন্তক উক্ত সন্মান প্ৰদান কৰা হয়।