ডিমা হাছাও, 27 মে': কেউদিশে কৰ'ণা ভাইৰাছ আতংক, আনহাতে অসমত বানেও ধাৰণ কৰিছে সংহাৰী ৰূপ । বিগত কেইবাদিনো ধৰি অসমত দি আছে প্ৰচুৰ বৰষুণ । ইয়াৰ ফলতেই বানৰ কবলত পৰিছে ডিমা হাছাও জিলাৰ কিছু অংশ । বিগত কিছুদিনৰপৰা দি থকা বৰষুণৰ লগতে পাহাৰৰ পৰা বৈ অহা পানীয়ে বহু অঞ্চল বুৰাই পেলোৱাৰ ফলত স্তব্ধ হৈ পৰিছে জনজীৱন ।
জিলাখনৰ কলাচান্দত কেইবাটাও ঘৰ সম্পূৰ্ণৰূপে পানীৰ তলত ডুবি গৈছে । আনহাতে বৰষুণৰ প্ৰভাৱত প্ৰকাণ্ড প্ৰকাণ্ড গছ উভালি পৰাৰ লগতে ঠায়ে ঠায়ে ভূমিস্খলনো দেখিবলৈ পোৱা গৈছে । ইয়াৰ ফলত বন্ধ হৈ পৰিছে উমৰাংচো-দিয়ুংমুখ ৰাষ্ট্ৰীয় ঘাইপথ ।