বিশ্বনাথ, ২৭ ছেপ্টেম্বৰ : পথ নে পুখুৰী ? বিশ্বনাথ জিলাৰ চতিয়াৰ ২ নং চতিয়া গাওঁ পঞ্চায়তত এটা পথে জ্বলা-কলা দেখুৱাইছে স্থানীয় ৰাইজক ৷ যোৱা ২০২০-২১ বৰ্ষতে চেনিমাৰী আৰু দোলাপানী সংযোগী পথটো নিৰ্মাণৰ বাবে প্ৰায় ৫ লাখ টকাৰ আবণ্টন কৰা হৈছিল ৷ কিন্তু ইয়াৰে ৩.৪৮ লাখ শ্ৰমিকৰ বাবে আৰু ১.৩৮ লাখ সামগ্ৰীৰ নামত ধাৰ্য্য কৰা হৈছিল। কিন্তু এই আচঁনিখনে যি দৰে কাম কৰিব লাগিছিল সেই দৰে কাম নকৰি তাৰ অধিকাংশ ধন গাওঁ পঞ্চায়ত প্ৰতিনিধি চৰকাৰী বিষয়াই হৰলুকি কৰা অভিযোগ উত্থাপন কৰিছে স্থানীয় ৰাইজে।
ইফালে এই আচঁনিৰ দুৰ্নীতিত পঞ্চায়তে দায়িত্ব প্ৰদান কৰা অভিযন্তা, খণ্ড উন্নয়ন বিষয়া আৰু পঞ্চায়ত সচিব প্ৰতিনিধি জড়িত থকা বুলি স্থানীয় ৰাইজে অভিযোগ উত্থাপন কৰে ৷ ৰাইজৰ অভিযোগ অনুসৰি পথটো নিৰ্মাণৰ নামত মাত্ৰ কেইগাড়ী মান মাটি পেলায়েই সমুদায় ধন হজম কৰিলে পঞ্চায়ত প্ৰতিনিধি আৰু অভিযন্তাই। এতিয়া পথটোৰ মাজ ভাগতে প্ৰকাণ্ড পুখুৰী সদৃশ গাঁত।