দুৰ্ঘটনাৰে কালিকা লগা শনিবাৰ

ৰাজ্যজুৰি হোৱা ভিন্ন দুৰ্ঘটনাত হতাহত কেইবাজনো লোক ৷ বাক্সাত নিহত এজন আৰু ক্ষেত্ৰীত আহত চাৰিজনকৈ লোক ৷

বাক্সা, 28 ডিচেম্বৰঃৰাজ্যজুৰি হোৱা ক্ৰমাগত দুৰ্ঘটনাত নিঃশেষ কেইবাটাও জীৱন ৷ বাক্সাৰ কুমাৰীকাটাৰ গনেশগুৰিত ভয়ংকৰ পথ দুৰ্ঘটনা ৷ ভাৰত-ভূটান সীমান্তৰ ৰঙিয়া-ভূটান ৰাষ্ট্ৰীয় ঘাইপথৰ গনেশগুৰিত বাইক ট্ৰাকৰ মাজত মুখামুখি সংঘৰ্ষৰ ফলত বাইক আৰোহী অৰ্গা বড়ো নামৰ লাট গাওঁবুঢ়াৰ থিতাতে মৃত্যু হয় ৷

মৃত লোকজনৰ ঘৰ মটঙাপাৰ আঙাৰকাটাৰ বুলি জানিব পৰা গৈছে । উল্লেখ্য যে ট্ৰাকখন কুমাৰীকাটাৰ পৰা ভূটান অভিমুখে গৈ আছিল আৰু মৃত বাইক আৰোহীজন ভূটানৰ দিশৰ পৰা কুমাৰীকাটাৰ গৃহ অভিমুখে গৈ আছিল । আনহাতে দূৰ্ঘটনাটো সংঘটিত হোৱাৰ পিছতেই ট্ৰাক চালক গৰাকী পলায়ন কৰা বুলি স্থানীয় লোক সকলে জানিবলৈ দিয়ে ।

ক্ষেত্ৰীঃ গুৱাহাটী মহানগৰীৰ উপকণ্ঠ অঞ্চল ক্ষেত্ৰীত শনিবাৰে সংঘটিত হোৱা পথ দুৰ্ঘটনাত গুৰুতৰভাৱে আহত হয় 4 জন লোক ৷ RJ 06 GB 8065 নম্বৰৰ ৰৈ থকা চিমেণ্ট ভৰ্তি ট্ৰেইলাৰত তীব্ৰ জোৰে খুন্দা মহানগৰ অভিমুখী AS 01 JC 4779 নম্বৰৰ নৈশ বাছে। দুৰ্ঘটনাত বিধ্বস্ত হয় নৈশ বাছৰ সন্মুখ ভাগ। পথ দুৰ্ঘটনাত নৈশ বাছত থকা শিশু মহিলাসহ চাৰিজন আহত হয় । ঘটনাৰ খবৰ পাই ক্ষেত্ৰীৰ আৰক্ষীৰ এটা দল উপস্থিত হয় আৰু আহত সকলক চিকিৎসাৰ বাবে গুৱাহাটী মেডিকেল কলেজ হাস্পাতালত ভৰ্তি কৰোৱা হয় ।

আৰু পঢ়কঃবিধ্বংসী কাৰ বোমা বিস্ফোৰণত নিহত 76 জনকৈ লোক