স্পৰ্টছ ডেস্ক, ২৭ জুলাই:হাংগেৰীৰ বুডাপেষ্টত চলি থকা বিশ্ব এথলেটিকছ চেম্পিয়নশ্বিপ ২০২৩ত শনিবাৰে ৪x৪০০ মিটাৰ দৌৰত ভাৰতীয় পুৰুষ দলে এছিয়াৰ অভিলেখ ভংগ কৰি প্ৰথমবাৰৰ বাবে ফাইনেলত প্ৰৱেশ কৰিবলৈ সক্ষম হয় । ভাৰতৰ মহম্মদ আনাছ ইয়াহিয়া, আমোজ জেকব, মহম্মদ আজমল ৱাৰিয়াথোদী আৰু ৰাজেশ ৰমেশে ২:৫৯:০৫ মিনিটত দৌৰ সমাপ্ত কৰি এছিয়াৰ নতুন অভিলেখ গঢ়ি দ্বিতীয় স্থান দখলেৰে ফাইনেলৰ বাবে যোগ্যতা অৰ্জন কৰে ।
এছিয়াৰ নতুন অভিলেখ গঢ়িবলৈ সক্ষম হোৱা ভাৰতীয় পুৰুষৰ ৰিলে দলটোক দেওবাৰে প্ৰধানমন্ত্ৰী নৰেন্দ্ৰ মোদীয়ে অভিনন্দন জনায় । "বিশ্ব এথলেটিকছ চেম্পিয়নশ্বিপত অবিশ্বাস্য দলীয় কাম ! আনাছ, আমোজ, ৰাজেশ ৰমেশ আৰু মহম্মদ আজমলে ফাইনেলত স্প্ৰিণ্ট কৰি এম ৪x৪০০ মিটাৰ ৰিলেত এছিয়ান অভিলেখ গঢ়িলে । ইয়াক বিজয়ী প্ৰত্যাৱৰ্তন হিচাপে স্মৰণ কৰা হ'ব, ভাৰতীয় এথলেটিকছৰ বাবে সঁচাকৈয়ে ঐতিহাসিক ।" প্ৰধানমন্ত্ৰী মোদীয়ে এক্স (পূৰ্বৰ টুইটাৰ)ত পোষ্ট কৰে ।
ভাৰতীয় দলটোৱে যোৱা বছৰ অৰেগনত অনুষ্ঠিত বিশ্ব চেম্পিয়নশ্বিপত জাপানে স্থাপন কৰা এছিয়াৰ ২:৫৯.৫১ ছেকেণ্ডৰ অভিলেখ ভংগ কৰে ৷ ভাৰতীয় দলটোৱে ৯টা দলৰ হিট-১(যোগ্যতা অৰ্জন দৌৰ)ত আমেৰিকাৰ পিচত দৌৰ অন্ত পেলায় । আমেৰিকাই ২:৫৮.৪৭ মিনিটত প্ৰথম স্থান দখল কৰাৰ বিপৰীতে গ্ৰেট ব্রিটেইনে ২:৫৯.৪২ ছেকেণ্ডেৰে তৃতীয় স্থান দখল কৰি ফাইনেলৰ বাবে স্থান নিশ্চিত কৰে ।