স্পৰ্টছ ডেস্ক, 26 ডিচেম্বৰ : আজিংকা ৰাহানেৰ প্ৰশংসাত পঞ্চমুখ প্ৰাক্তন ক্ৰিকেটাৰ ভিভিএছ লক্ষ্মণ ৷ বক্সিং ডে টেষ্টৰ প্ৰথম দিনা ভাৰতক যিদৰে ৰাহানেই নেতৃত্ব প্ৰদান কৰিলে তাক লৈ নিজৰ আনন্দ প্ৰকাশ কৰিলে লক্ষ্মণে ৷ প্ৰথম ইনিংছত ভাৰতে অষ্ট্ৰেলিয়া দলক 195 ৰাণত অল আউট কৰিবলৈ সক্ষম হয় ৷
প্ৰথম দিনৰ খেলৰ অন্তত লক্ষ্মণে কয়, "ভাৰতে ভাল প্ৰদৰ্শন আগবঢ়ালে ৷ বলাৰসকলে পুনৰবাৰ দূৰ্দান্ত প্ৰদৰ্শন দেখালে, আত্মপ্ৰকাশ কৰা দুয়োগৰাকী খেলুৱৈকে আত্মবিশ্বাসী যেন দেখা গ'ল ৷ ৰাহানেই দলটোক যোগ্য নেতৃত্ব প্ৰদান কৰিলে আৰু অতি গুৰুত্বপূৰ্ণ কথাটো হ'ল যে, তেওঁলোকে এডিলেইডত পৰাস্ত হোৱাৰ বোজা কঢ়িয়াই নিয়া নাই ৷"
উল্লেখ্য যে, এডিলেইড অভেলত অনুষ্ঠিত প্ৰথম টেষ্টত ভাৰতে 8 উইকেটত পৰাস্ত হ'বলগা হৈছিল ৷ প্ৰথম ইনিংছত অগ্ৰগতি লোৱাৰ পাচতো দ্বিতীয় ইনিংছত মাত্ৰ 36 ৰাণতে আটাইকেইটা উইকেট হেৰুৱাইছিল ভাৰতে ৷
কিন্তু দ্বিতীয় টেষ্টৰ প্ৰথম দিনা ভাৰতীয় বলাৰ জছপ্ৰীত বুমৰাহ আৰু ৰবীচন্দ্ৰন অশ্বিনৰ দূৰ্দান্ত প্ৰদৰ্শনৰ বাবে ভাৰতে অষ্ট্ৰেলিয়া দলক 195 ৰাণত অল আউট কৰিবলৈ সক্ষম হয় ৷ আজিৰ মেচত বুমৰাহে 56 ৰাণ দি চাৰিটা উইকেট দখল কৰিছিল ৷ আনহাতে, ৰবীচন্দ্ৰন অশ্বিনে 24 অ'ভাৰৰ বলিং কৰি 35 ৰাণত দখল কৰিছে তিনিটা উইকেট ৷