ৰাইজৰ বাবে ঘৰতে বিহু নাচিলে বৰষা ৰাণীয়ে

এইবাৰ ৰাজ্যৰ সৰ্বত্ৰে নাই ৰঙালীৰ উছাহ ৷ বেজাৰ লাগিছে শিল্পীসকলৰো ৷ দুখৰ মাজতে শিল্পীসকলে ৰাইজক অকণমান আনন্দ দিয়াৰ প্ৰয়াস কৰিছে ৷ ৰাইজৰ বাবে ঘৰতে বিহু নাচিলে অসমৰ জনপ্ৰিয় অভিনেত্ৰী বৰষা ৰাণী বিষয়াই ৷

চিটাৰা ডেস্ক,13 এপ্ৰিলঃ গৰু বিহুৰ দিনা ৰাইজৰ বাবে এপাক বিহু নাচিলে অসমৰ জনপ্ৰিয় অভিনেত্ৰী বৰষা ৰাণী বিষয়াই ৷ কৰ'ণা ভাইৰাছৰ আতংকৰ বাবে ৰাজ্যৰ চৌদিশে নিমাওমাও পৰিৱেশ ৷ পূৰ্বৰ দৰে উছাহ নাই ৰাজ্যবাসীৰ মাজত ৷ লক ডাউনৰ বাবে ঘৰতে সোমাই আছে সাধাৰণ ৰাইজৰ পৰা আৰম্ভ কৰি তাৰকালৈকে ৷ এইবেলি বিহুত বৰকৈ বেজাৰ লাগিছে শিল্পীসকলৰ ৷ তাৰ মাজতে সামাজিক ব্যৱধান বৰ্তাই ৰাখি ছ'চিয়েল মিডিয়াৰ যোগেদি ৰাইজৰ মনত আনন্দ দিয়াৰ প্ৰয়াস কৰি আছে তাৰকাসকলে ৷

শেহতীয়াকৈ ৰঙালী বিহু উপলক্ষে , অসমৰ জনপ্ৰিয় অভিনেত্ৰী বৰষা ৰাণী বিষয়াই ছ'চিয়েল মিডিয়াযোগে ৰাইজলৈ প্ৰেৰণ কৰে এটি বিশেষ ভিডিঅ' ৷ ভিডিঅ'টোৰ মাধ্যমেৰে বিহু নৃত্য প্ৰদৰ্শনৰ জৰিয়তে বৰষাই ৰাইজলৈ আগবঢ়াইছে এটি ক্ষুদ্ৰ উপহাৰ ৷ এই বিশেষ ভিডিঅ'টোৰ কেমেৰা, সম্পাদনা আৰু কালাৰ কাৰেকচনৰ বাবে বৰষাই ধন্যবাদ জ্ঞাপন কৰে তেওঁৰ ভাতৃ অংকুৰ বিষয়াক ৷ লগতে বৌয়েক সুমিতা বিষয়াকো ভিডিঅ'টো কৰাত সহায় কৰাৰ বাবে ধন্যবাদ জনায় অভিনেত্ৰীগৰাকীয়ে ৷