ইণ্টাৰনেশ্যনেল ডেস্ক, ২২ নৱেম্বৰ : কাটাৰে ইজৰাইল আৰু হামাছৰ মাজত যুদ্ধবিৰতি আৰু বন্দী বিনিময়ৰ চুক্তিৰ কথা নিশ্চিত কৰিছে । এক বিবৃতিত কাটাৰ প্ৰশাসনে কয় যে এই যুদ্ধবিৰতি আৰম্ভণিৰ সময় আগন্তুক ২৪ ঘণ্টাৰ ভিতৰত ঘোষণা কৰা হ'ব আৰু ই চাৰি দিন ধৰি চলিব । কাটাৰৰ বৈদেশিক মন্ত্ৰালয়ৰ পৰা বুধবাৰে পুৱা দিয়া বিবৃতিটোত এই চুক্তিখনক ইজিপ্ত, আমেৰিকা আৰু কাটাৰৰ মধ্যস্থতাৰ ফলত মানৱীয় যুদ্ধবিৰতিৰ বাবে প্ৰস্তুত কৰা আলোচনাৰ বিষয়েও কোৱা হৈছে ।
বিবৃতিটোত কোৱা হৈছে যে যুদ্ধবিৰতি কেতিয়াৰ পৰা আৰম্ভ হ'ব তাৰ সময় পৰৱৰ্তী ২৪ ঘণ্টাৰ ভিতৰত ঘোষণা কৰা হ'ব । আনহাতে, যুদ্ধবিৰতি চাৰি দিন ধৰি চলিব যদিও চৰ্তসাপেক্ষে ইয়াৰ সময়সীমাৰ সম্প্ৰসাৰণ ঘটিব পাৰে । চুক্তিখনত ইজৰাইলৰ কাৰাগাৰত বন্দী হৈ থকা কেইবাগৰাকীও পেলেষ্টাইনী মহিলা আৰু শিশুৰ মুক্তিৰ বিনিময়ত বৰ্তমান গাজা ষ্ট্ৰিপত বন্দী হৈ থকা ৫০ গৰাকী অসামৰিক মহিলা আৰু শিশুক মুক্তি দিয়াও অন্তৰ্ভুক্ত আছে । চুক্তিখন কাৰ্যকৰী কৰাৰ পিছৰ পৰ্যায়ত মুকলি কৰি দিবলগা লোকৰ সংখ্যা বৃদ্ধি কৰা হ'ব ।