Ajay Kajol marriage Anniversary: বিয়াৰ পূৰ্বে কেইবাৰ ব্ৰেকআপ হৈছিল কাজল-অজয়ৰ মাজত ?

বলীউডৰ আটাইতকৈ মৰম লগা আৰু প্ৰিয় দম্পতী অজয় দেৱগণ আৰু কাজলৰ আজি বিবাহ বাৰ্ষিকী ৷ প্ৰথম অৱস্থাত অজয়ে কাজলক বহু অহংকাৰী বুলি ভাবিছিল আৰু কাজলেও অজয়ক পছন্দ কৰা নাছিল ৷ কিন্তু পৰবৰ্তী সময়ত কেনেকৈ দুয়োৰে মাজত গঢ় লৈ উঠিল প্ৰেমৰ সম্পৰ্ক ? কেনেকৈ বিবাহপাশত আবদ্ধ হ’ল দুয়ো ? জানিবলৈ পঢ়ক এই সম্পূৰ্ণ প্ৰতিবেদন ৷

চিটাৰা ডেস্ক, 24 ফেব্ৰুৱাৰী: আজি অভিনেতা অজয় দেৱগণ আৰু কাজলৰ 24 সংখ্যক বিবাহ বাৰ্ষিকী (Ajay and Kajol 24rd marriage Anniversary) ৷ বলীউডৰ আটাইতকৈ মৰম লগা আৰু প্ৰিয় দম্পতী হৈছে অজয় দেৱগণ আৰু কাজল ৷ দুয়োৰে অন স্ক্ৰীণ আৰু অফ স্ক্ৰীণ কেমিষ্ট্ৰীয়ে হৃদয় জয় কৰিছিল দৰ্শকৰ লগতে তেওঁলোকৰ অনুৰাগীৰ । অজয় দেৱগণ আৰু কাজলে একেলগে প্ৰায় 9 খন ছবিত অভিনয় কৰিছে ।

উল্লেখ্য যে ৰূপালী পৰ্দাত ফ্লপ হোৱা অজয় আৰু কাজলৰ ছবি বাস্তৱ জীৱনত ইমানেই হিট যে মানুহে প্ৰেমৰ উদাহৰণ দিবলৈ তেওঁলোকৰ নাম লয় ৷ বি-টাউনৰ অন্যতম আদৰ্শ দম্পতী অজয় ​​আৰু কাজলে ১৯৯৯ চনৰ ২৪ ফেব্ৰুৱাৰীত অৰ্থাৎ আজিৰ দিনটোতে পৰিয়াল তথা অগ্নিক সাক্ষী কৰি বিবাহ পাশত আবদ্ধ হৈছিল । তেতিয়াৰে পৰা সকলোৰে বাবে দুয়োগৰাকী হৈ পৰে এক আদৰ্শ দম্পতী ৷ আজি অজয় আৰু কাজলৰ বিবাহ বাৰ্ষিকী উপলক্ষে জানো আহক তেওঁলোকৰ কিছুমান নজনা কথা . . .

দুয়োৰে স্বভাৱ চৰিত্ৰ সম্পূৰ্ণ পৃথক ৷ দুয়োৰে স্বভাৱ চৰিত্ৰত একো মিল নাই যদিও কিন্তু দুয়োৰে মাজত আছে এটা মিল - সেইটো হৈছে ইগৰাকীৰ সিগৰাকীৰ প্ৰতি থকা প্ৰেম ভালপোৱা ৷ বিপৰীত প্ৰকৃতিৰ দুগৰাকী মানুহৰ মাজত হোৱা "Kabhi Na tutne Wali" সম্পৰ্কই তেওঁলোকক সকলোৰে পৰা পৃথক কৰি তোলে ৷

কিন্তু এইখিনিতে এটা কথা উল্লেখ কৰিব লাগিব যে সকলো সম্পৰ্কই প্ৰথমে শক্তিশালী নহলেও লাহে লাহে সময়ৰ সুঁতত সম্পৰ্কবোৰ দৃঢ় আৰু গাঢ় হৈ গৈ থাকে ৷ তেনেকৈয়ে প্ৰাৰম্ভিক পৰ্যায়ত অজয় আৰু কাজলৰ সম্পৰ্কও ইমান শক্তিশালী কিম্বা গাঢ় নাছিল ৷ দুয়োৰে মাজত প্ৰথম অৱস্থাত কেৱল মাথো আছিল বিবাদ ।

কাজলৰ স্বভাৱটোক অজয়ে ভাল পোৱা নাছিল, সিংঘাম অজয়ৰ স্বভাৱকো ভাল পোৱা নাছিল অভিনেত্ৰীগৰাকীয়ে । কাজলক এসময়ত অহংকাৰী বুলি ভাবিছিল অজয়ে ৷ কিন্তু কয় নহয়, ভাগ্যত বিধাতাই লিখি দিলে কোনেনো মচিব পাৰে ৷ তেনেকুৱাই হ’ল এওঁলোকৰ ক্ষেত্ৰতো ৷ অজয় দেৱগনেও ক’ত জানিছিল বা ভাবিছিল যিগৰাকীক তেওঁ আটাইতকৈ অহংকাৰী ছোৱালী বুলি ভাবিছিল তেওঁৱেই এদিন পত্নী হৈ সিংঘামৰ হৃদয়ত শাসন কৰিব । হয়, প্ৰেম কৰা নাযায়, প্ৰেম হৈ যায় ৷ তাৰেই এক জলন্ত উদাহৰণ অজয় আৰু কাজল ৷

অজয় আৰু কাজলৰ প্ৰথম লগ হৈছিল ১৯৯৫ চনত ‘হলচল’ ছবিৰ চেটত । তেতিয়া তেওঁলোকৰ মাজত হোৱা প্ৰথম লগালগৰ পিচতে অজয়ে সিদ্ধান্ত লৈছিল যে তেওঁ আৰু কেতিয়াও কাজলক লগ নাপায় । কিন্তু আকৌ কৈছো যে ভাগ্যত যি লিখা থাকে, তাকেই হ’ব ৷ ছবিখনৰ শ্বুটিঙৰ সময়ত দুয়োৰে মাজত আৰম্ভ হয় কথা-বতৰা ৷

পৰৱৰ্তী সময়ত দুয়োৰে মাজত এক বন্ধুত্বৰ এই ভাল সম্পৰ্ক গঢ় লৈ উঠে ৷ দুয়োৰে মাজৰ এই বন্ধুত্ব ক্ৰমান্বয়ে গভীৰ হৈ আহে । দুয়োৰে বন্ধুত্ব ইমানেই গভীৰ হৈ পৰিল যে অভিনেত্ৰীগৰাকীয়ে নিজৰ জীৱনৰ প্ৰতিটো সৰু সৰু কথা অভিনেতাজনৰ সৈতে শ্বেয়াৰ কৰিবলৈ আৰম্ভ কৰিলে । আনকি কাজলে অজয়ৰ পৰা ভাল পোৱাৰ সম্পৰ্কক লৈ পৰামৰ্শ বিচাৰিছিল, কাৰণ সেই সময়ত দুয়োজনে নিজৰ নিজৰ জীৱনত কাৰোবাৰ লগত ডেটিং কৰিছিল ।

পৰৱৰ্তী সময়ত দুয়োৰে মাজত গঢ় লৈ উঠে প্ৰেমৰ সম্পৰ্ক ৷ কিন্তু কাজল আৰু অজয়ৰ মাজৰ সম্পৰ্ক বেছি দিন নাথাকিল আৰু দুয়োৰে মাজত বিচ্ছেদ ঘটিল । ব্ৰেকআপৰ পিচত পৰৱৰ্তী ছবিত অভিনয়ৰ জৰিয়তে দুয়ো আকৌ লগ হয় আৰু একেলগে আৰম্ভ কৰে শ্বুটিং ৷ শ্বুটিং চলি থকাৰ মাজতে পূৰ্বৰ কথা পাহৰি পুনৰ এবাৰ সকলো ঠিক হৈ পৰে তেওঁলোকৰ মাজত ৷ দুয়োৰে মাজত পুনৰবাৰ জাগ্ৰত হৈ পৰে পূৰ্বৰ প্ৰেম ৷ কিন্তু তেওঁলোকৰ এই সম্পৰ্ক চাৰি বছৰে সকলোৰে পৰা লুকুৱাই ৰাখিছিল ।

চাৰি বছৰ ধৰি গোপনে প্ৰেম কৰাৰ পিচত অজয় ​​আৰু কাজলে বিবাহপাশত আৱদ্ধ হোৱাৰ সিদ্ধান্ত লয় । আমোদজনক কথাটো হ’ল, দুয়োৰে প্ৰেম কাহিনীত ইগৰাকীয়ে আনগৰাকীক এপাহি গোলাপ ফুল দিয়াৰো প্ৰয়োজন নহ’ল, আনকি 'মই তোমাক ভাল পাওঁ' বুলি কোৱাৰো প্ৰয়োজন হোৱা নাছিল দুয়োৰে মাজত ৷ যিয়েই নহওক, দুখন হৃদয়ৰ মিলন হৈছিল আৰু সেইটোৱেই পৰ্যাপ্ত আছিল দুয়োৰে বাবে । অৱশেষত পৰিয়াল আৰু ঘনিষ্ঠ বন্ধুৰ উপস্থিতিত কাজল আৰু অজয় বিবাহপাশত আবদ্ধ হয় । বৰ্তমান দুই সন্তানৰ পিতৃ-মাতৃ অজয় আৰু কাজল ৷ কন্যা ন্যাছা আৰু পুত্ৰ যুগক লৈ বহুতৰে আদৰ্শ হৈ পৰা এটি সুখৰ পৰিয়াল ।

লগতে পঢ়ক:Kiara wishes Mom Birthday: কিয়াৰাই এনেদৰে জনালে মাতৃক জন্মদিনৰ শুভেচ্ছা, শ্বেয়াৰ কৰিলে বিবাহৰ Unseen ফটো