নেশ্যনেল ডেস্ক, ২২ জুলাই :ভাৰতৰ ৰে'ল মন্ত্ৰালয়ে বিশ্ব বেংকৰ পৰা প্ৰায় ১২,৫৪৩ কোটি টকা ঋণ লৈছে । শুকুৰবাৰে ৰাজ্যসভাত এই কথা স্বীকাৰ কৰে দেশৰ ৰে'ল মন্ত্ৰী অশ্বিনী বৈষ্ণৱে । ৰে'ল মন্ত্ৰীগৰাকীয়ে সংসদত জনোৱা মতে ইষ্টাৰ্ণ ডেডিকেটেড ফ্ৰেইট কৰিডৰ (Eastern Dedicated Freight Corridor) নিৰ্মাণৰ বাবে বিশ্ব বেংকৰ পৰা এই বৃহৎ পৰিমাণৰ ধনৰ ঋণ লৈছে (Railways borrowed over Rs 12000 crores from world bank)।
বৈষ্ণৱে লগতে কয় যে বিশ্ব বেংকৰ পৰা লোৱা তিনিটা ঋণৰ অন্তিম তাৰিখ আছিল ক্ৰমে ২০১১ চনৰ ২৭ অক্টোবৰ, ২০১৪ চনৰ ১১ ডিচেম্বৰ আৰু আনটো ২০১৬ চনৰ ২১ অক্টোবৰ । ঋণৰ পৰিমাণ আছিল ক্ৰমান্বয়ে ৫৫৫ আমেৰিকান ডলাৰ, ৬৬০ আমেৰিকান ডলাৰ আৰু ৫৬০ আমেৰিকান ডলাৰ । কেন্দ্ৰীয় মন্ত্ৰীগৰাকীয়ে গুজৰাটত ফ্ৰেইট কৰিডৰ সম্পৰ্কীয় কামত ব্যয় কৰা ধন সন্দৰ্ভত আন এক প্ৰশ্নৰ উত্তৰত কয় যে এতিয়ালৈকে পূব আৰু পশ্চিম অংশৰ ফ্ৰেইট কৰিডৰ নিৰ্মাণৰ বাবে প্ৰায় ৯০,৭২৩ কোটি টকা ব্যয় কৰা হৈছে ।