ডিফু, 11 জুন: মঙলবাৰৰ পুৱাই কাৰ্বি পাহাৰত সংঘটিত এক নৃশংস হত্যাকাণ্ডৰ ঘটনাই ৰাজ্যজুৰি সৃষ্টি কৰিছে জোকাৰণিৰ ৷ ডিফুত সংঘটিত হত্যাৰ ঘটনাটো সন্দৰ্ভত পোহৰলৈ আহিছে বহু ন ন তথ্য । শেহতীয়াকৈ জানিব পৰা মতে, হত্যাৰ বলি যুৱতীগৰাকী আছিল বিবাহিতা । এই কথা সংবাদ মাধ্যমৰ আগত অৱগত কৰিছে কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে ।
মঙলবাৰে এক সংবাদমেল সম্বোধন কৰি মুখ্য কাৰ্যবাহী সদস্য তুলিৰাম ৰংহাঙে সংবাদ মাধ্যমৰ আগত কয়, “মই শুনিব পাইছো যে ডিফুত সোমবাৰৰ নিশা হত্যা কৰা যুৱতীগৰাকী বিবাহিত আছিল । পূৰ্বে এগৰাকী প্ৰাক্তন উগ্ৰপন্থী সদস্যৰ সৈতে যুৱতীগৰাকীৰ বিবাহ হৈছিল যদিও পৰৱৰ্তী সময়ত দুয়োৰে বিবাহ বিচ্ছেদ ঘটে আৰু যুৱতীগৰাকী অকলে থাকিবলৈ লয় ।”
কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে সমগ্ৰ হত্যাকাণ্ডটোক তীব্ৰ ভাষাৰে গৰিহণা দি দোষীক দৃষ্টান্তমূলক শাস্তি প্ৰদানৰ দাবী তুলিছে ।
উল্লেখযোগ্য যে, সোমবাৰৰ মাজ নিশা প্ৰায় 1 বজাত শুই থকা অৱস্থাতে দুৰ্বৃত্তই যুৱতীগৰাকীক গুলীয়াই হত্যা কৰে বুলি জানিব পৰা গৈছে । ডিফুত দুই ভগ্নীসহ বসবাস কৰা যুৱতীগৰাকীৰ হত্যাৰ কাৰণ অৱশ্যে এই পৰ্যন্ত স্পষ্ট হোৱা নাই । জানিব পৰা মতে, নিশা কেঁচা ঘৰৰ বেৰ ভাঙি ঘৰৰ ভিতৰত প্ৰৱেশ কৰিছিল দুৰ্বৃত্তই ।
আৰক্ষীয়ে ঘটনাস্থলীত উপস্থিত হৈ মৃতদেহটো উদ্ধাৰ কৰিছে । আৰক্ষীয়ে ইতিমধ্যে তদন্ত আৰম্ভ কৰি মৃতদেহটো মৰণোত্তৰ পৰীক্ষাৰ বাবে ডিফু মেডিকেল কলেজ হাস্পতাললৈ প্ৰেৰণ কৰিছে বুলি জানিব পৰা গৈছে ।
লগতে পঢ়ক: ডিফুত ঘৰৰ ভিতৰতে গুলীয়াই থৈ গ'ল যুৱতীক - Diphu murder case
