নিউজ ডেস্ক, ১৩ ছেপ্টেম্বৰ : দেওবাৰে দিল্লীত অন্ত পৰে ঐতিহাসিক জি-২০ শীৰ্ষ সন্মিলন । বিশ্ব নেতাসকলে অংশগ্ৰহণ কৰা এই সন্মিলন ভাৰতৰ বাবে যথেষ্ট গুৰুত্বপূৰ্ণ আছিল । নতুন দিল্লী জি-২০ ঘোষণা-পত্ৰই বহুপাক্ষিকতাৰ চেম্পিয়ন হ'বলৈ আৰু ৰাছিয়া-ইউক্ৰেইন সংকটৰ দৰে বিশ্বজনীন উন্নয়নমূলক বিষয় আৰু সংঘাতৰ ক্ষেত্ৰত বিশ্বক একত্ৰিত কৰাৰ ভাৰতৰ মহান সামৰ্থ্য প্ৰদৰ্শন কৰিছে । বুধবাৰে ভাৰতৰ জি-২০ শ্বেৰ্পা অমিতাভ কান্তে এনেদৰে কয় ।
ঘোষণা-পত্ৰৰ এক গুৰুত্বপূৰ্ণ অংশ সেউজ উন্নয়ন চুক্তিয়ে ভাৰতীয় স্বয়ংচালিত আৰু উপাদান খণ্ডক বৈদ্যুতিক আৰু বহনক্ষম গতিশীলতাৰ ক্ষেত্ৰত বিশ্ব নেতা হোৱাৰ এক মহান সুযোগ প্ৰদান কৰিছে বুলি তেওঁ লগতে কয় । অটোমোটিভ কম্প'নেণ্ট মেনুফেকচাৰ্ছ এছোচিয়েচন অব ইণ্ডিয়াৰ (এচিএমএ) বাৰ্ষিক সন্মিলনত ভাষণ দি উদ্যোগটোক সৰ্ববৈদ্যুতিক হ'বলৈও তেওঁ কয় ।
"নতুন দিল্লীত প্ৰকাশ পোৱা নেতাসকলৰ ঘোষণা-পত্ৰ অতি বেছি সামগ্ৰিক, অতি উচ্চাকাংক্ষী । ইয়াত সৰ্বমুঠ ৮৩ টা অধ্যায় আছে । এইটো প্ৰথমবাৰৰ বাবে হৈছে যে ৮৩ টা অধ্যায়ৰ মাজত আটাইকেইটাতে ১০০ শতাংশ সহমত আছে ।" কান্তে দৃঢ়তাৰে কয় । ঘোষণা-পত্ৰখনত কোনো 'সংৰক্ষণ, বন্ধনী আৰু সভাপতিৰ সাৰাংশ' নাই বুলি উল্লেখ কৰি তেওঁ কয় যে ৰাছিয়া-ইউক্ৰেইন সংকটৰ ওপৰত আঠটা অধ্যায়কে ধৰি ৮৩ টা অধ্যায়ৰ আটাইকেইটাকে সৰ্বসন্মতিক্ৰমে গ্ৰহণ কৰা হৈছে বুলিও তেওঁ কয় ।