নেশ্যনেল ডেস্ক,১৯ আগষ্ট :দিল্লীৰ উপ-মুখ্যমন্ত্ৰী মনীষ চিছোদিয়াৰ বাসগৃহত চিবিআইৰ দল (CBI raids against Manish Sisodia)। দিল্লী চৰকাৰৰ নতুন আবকাৰী নীতিৰ দুৰ্নীতি সম্পৰ্কীয় এক গোচৰত চিবিআইয়ে উপ-মুখ্যমন্ত্ৰীগৰাকীৰ বিৰুদ্ধে অভিযান আৰম্ভ কৰিছে । উপ-মুখ্যমন্ত্ৰীগৰাকীয়ে নিজে টুইটযোগে এই কথা প্ৰকাশ কৰিছে (Manish Sisodia tweet about CBI raid)। চিছোদিয়াই টুইটযোগে কয় যে চিবিআইৰ দল তেওঁৰ বাসগৃহলৈ আহিছে ।
দলটোক তেওঁ স্বাগতম জনোৱাৰ লগতে সকলো প্ৰকাৰে সহায় কৰাৰো প্ৰতিশ্ৰুতি দিছে । চিছোদিয়াৰ মতে তেওঁ এগৰাকী কঠোৰভাবে সৎ লোক । লাখ লাখ শিশুৰ ভৱিষ্যৎ নিৰ্ধাৰণ কৰিছে দিল্লী চৰকাৰে । কিন্তু উদ্বেগ প্ৰকাশ কৰি তেওঁ কয় যে যিয়ে দেশত ভাল কাম কৰে তেওঁকো হাৰাশাস্তি কৰা হয় । সেইকাৰণে আমাৰ দেশ এতিয়াও ১ নম্বৰ হ'ব পৰা নাই বুলিও তেওঁ টুইটত উল্লেখ কৰে ।
পুৱাৰ ভাগত তেওঁ এই সন্দৰ্ভত কেইবাটাও টুইট কৰে । আন এটা টুইটত তেওঁ কয় যে পূৰ্বেও তেওঁৰ বিৰুদ্ধে বহু অভিযোগ উত্থাপন কৰা হৈছিল । কিন্তু এতিয়ালৈ একো পোৱা নগ'ল । তেওঁ আশাবাদী যে এই গোচৰতো একো নাপায় । দেশত শিক্ষাৰ উন্নয়নৰ বাবে তেওঁ কৰা কামত কোনেও বাধা দিব নোৱাৰে বুলিও তেওঁ উল্লেখ কৰে ।
ইফালে আৰু এটা টুইটত চিছোদিয়াই এক প্ৰকাৰ কেন্দ্ৰীয় নেতৃত্বাধীন বিজেপি চৰকাৰ আৰু নেতাসকলক সমালোচনা কৰি কয় যে দিল্লীৰ শিক্ষা আৰু স্বাস্থ্য বিভাগৰ উন্নয়ন দেখি তেওঁলোক বিচলিত হৈছে । সেয়ে স্বাস্থ্য আৰু শিক্ষা মন্ত্ৰীক তেওঁলোকে টাৰ্গেট কৰিছে । যাতে দুয়োটা বিভাগৰে ভাল কামত বাধা দিব পাৰে । দুয়োগৰাকী মন্ত্ৰীৰ ওপৰত মিছা অভিযোগ জাপি দিয়া হৈছে আৰু আদালতত সকলো ফাদিল হ'ব বুলিও তেওঁ দাবী কৰে ।