নেশ্যনেল ডেস্ক, ২ জুন : দিল্লীৰ মুখ্যমন্ত্ৰী অৰবিন্দ কেজৰিৱাল দেওবাৰে পুনৰ তিহাৰ কাৰাগাৰলৈ উভতিব । কিয়নো তেওঁৰ ২১ দিনৰ জামিনৰ ম্যাদ দেওবাৰে সম্পূৰ্ণ হ'ব । উচ্চতম ন্যায়ালয়ে তেওঁক নিৰ্বাচনী প্ৰচাৰৰ বাবে ৩ সপ্তাহৰ বাবে অন্তৱৰ্তীকালীন জামিন প্ৰদান কৰিছিল । ইফালে শনিবাৰে ৰাউজ এভিনিউ আদালতে অন্তৱৰ্তীকালীন জামিন আবেদনৰ ওপৰত ৫ জুনৰ বাবে আদেশ সংৰক্ষিত ৰাখে ।
কেজৰিৱালে চিকিৎসাৰ বিষয় উল্লেখ কৰি জামিনৰ সম্প্ৰসাৰণ বিচাৰিছিল । কিন্তু আদালতে তেওঁৰ আবেদন খাৰিজ কৰে । ইয়াৰ পূৰ্বে উচ্চতম ন্যায়ালয়ে ১০ মে'ত তেওঁৰ অন্তৱৰ্তীকালীন জামিনত অনুমোদন জনাইছিল ।
উল্লেখ্য যে ২১ মাৰ্চত গ্ৰেপ্তাৰ হোৱাৰ পিচত কেজৰিৱাল ১০ দিনৰ বাবে ইডিৰ জিম্মাত আছিল । তাৰ পিচত ১ এপ্ৰিলত আদালতে তেওঁক ন্যায়িক জিম্মালৈ প্ৰেৰণ কৰে । তেওঁ তিহাৰত ৩৯ দিন কটাইছিল ।
কেজৰিৱালে যোৱা শুকুৰবাৰে কয় যে তেওঁ দেওবাৰে আবেলি প্ৰায় ৩ বজাত কাৰাগাৰ কৰ্তৃপক্ষৰ সন্মুখত আত্মসমৰ্পণ কৰিব । দুপৰীয়া ২ বজাত তেওঁ চিভিল লাইনৰ বাসগৃহৰ পৰা ৰাওনা হ'ব । তেওঁ প্ৰথমে ৰাজঘাটৰ হনুমান মন্দিৰ দৰ্শন কৰিব । তাৰ পিচত দলৰ মুখ্য কাৰ্যালয় লৈ যাব । তেওঁ তাত দলীয় কৰ্মীসকলক সম্বোধন কৰিব । আপৰ মুখ্য কাৰ্যালয়ৰ পৰা পোনে পোনে তেওঁ তিহাৰ কাৰাগাৰলৈ যাব ।
কেজৰিৱালৰ জামিনৰ সময়ত উচ্চতম ন্যায়ালয়ে কৈছিল যে ইডিয়ে কেজৰিৱালক গ্ৰেপ্তাৰ কৰাৰ পূৰ্বে ৯ বাৰ জাননী জাৰি কৰিছিল । কিন্তু তেওঁ উপস্থিত হোৱা নাছিল । সেইটো কেজৰিৱালৰ এক নেতিবাচক দিশ আছিল । কিন্তু গুৰুত্বপূৰ্ণ কথাটো হ'ল যে কেজৰিৱাল হৈছে দিল্লীৰ মুখ্যমন্ত্ৰী আৰু ৰাষ্ট্ৰীয় ৰাজনৈতিক দলৰ নেতা । তেওঁৰ বিৰুদ্ধে অভিযোগ গুৰুতৰ তাত কোনো সন্দেহ নাই । কিন্তু তেওঁ এতিয়ালৈকে দোষী সাব্যস্ত হোৱা নাই ।
এই গোচৰটোৰ তদন্ত ২০২২ চনৰ আগষ্টৰ পৰা অব্যাহত আছে । আনহাতে কেজৰিৱালক ২০২৪ চনৰ ২১ মাৰ্চত গ্ৰেপ্তাৰ কৰা হৈছিল । তেওঁৰ গ্ৰেপ্তাৰক প্ৰত্যাহ্বান জনোৱা এখন আবেদন আদালতত বিচাৰাধীন হৈ আছে । তাৰ ওপৰতো আদালতে ৰায় দিব । কেজৰিৱালৰ ২১ দিনৰ বাবে প্ৰস্থানে কোনো প্ৰভাৱ পেলাব নোৱাৰে বুলি আদালতে স্পষ্ট কৰি দিছিল আৰু তেওঁক জামিন প্ৰদান কৰিছিল ।
