গুৱাহাটী,২৫ মাৰ্চ:আইছিছত যোগদান কৰিম বুলি ঘোষণা কৰি গ্ৰেপ্তাৰ হোৱা গুৱাহাটী আই আই টিৰ মেধাৱী ছাত্ৰ তৌছিফ আলী ফাৰুকীয়ে ইউ টিউবত আইছিছৰ ভিডিঅ' চাই অনুপ্রাণিত হোৱা কথা আৰক্ষীৰ জেৰাত প্ৰকাশ কৰিছে । তেওঁ লগতে প্ৰতিদিনে কোৰাণ পঢ়াৰ কথা স্বীকাৰ কৰি শেহতীয়াকৈ অত্যধিক নিচাসক্ত হৈ পৰা বুলিও আৰক্ষীৰ আগত উল্লেখ কৰে ।
হোষ্টেলত অকলশৰীয়াকৈ থাকি ভালপোৱা ধর্মীয় গোড়ামিত বিশ্বাসী তৌছিফে প্রতিদিনেই পাঁচবাৰকৈ নামাজ পঢ়া বুলি ইতিমধ্যে তেওঁৰ সহপাঠীসকলেও আৰক্ষীক জানিবলৈ দিয়ে । এছ টি এফৰ লকআপত থকাৰ সময়তো তেওঁ নামাজ পঢ়া বুলি তদন্তকাৰী আৰক্ষীয়ে জানিবলৈ দিছে । আৰক্ষীৰ তদন্তত প্রকাশ পোৱা মতে, দিল্লীৰ পাটনা হাউচৰ কাষতে ঘৰ তৌছিফৰ ।
সৰুৰে পৰা অতি মেধাৱী তৌছিফৰ আই আই টিত শিক্ষাগ্রহণৰ সপোন আছিল । তৌছিফৰ পিতৃ-মাতৃ পৃথকে পৃথকে থাকে যদিও মাতৃয়ে এখন কাপোৰৰ দোকান চলায় । তদুপৰি তৌছিফৰ সম্পৰ্কীয় এজন খুড়াক অৱসৰপ্ৰাপ্ত আই পি এছ বিষয়া । ইছলামিক ভাৰতৰ সপোন দেখা তৌছিফে ইউ টিউবত আইছিছৰ ভিডিঅ' চাই অনুপ্রাণিত হোৱা বুলিও আৰক্ষীৰ জেৰাত প্ৰকাশ কৰিছে ।
ইছলামিক ষ্টেটৰ অধ্যুষিত খোড়চান প্রদেশলৈ যোৱাৰ লক্ষ্যৰে আই আই টিৰ হোষ্টেলৰ পৰা ওলাই অহা তৌছিফে আইছিছৰ যোগদানৰ বাবে বিভিন্নজনলৈ ই-মেইলো প্ৰেৰণ কৰাৰ কথা স্বীকাৰ কৰিছে । যাৰ বাবে এছ টি এফে তৌছিফৰ লগতে সহপাঠী ছোহেইল উৰ ৰহমানৰ মোবাইল, লেপটপ জব্দ কৰি পৰীক্ষা কৰিছে ।