বাক্সা, ২৩ জানুৱাৰী : "বড়ো জাতি কোনো কালে নিঃশেষ হৈ নাযায় ৷ বড়ো জাতিৰ নিজৰ প্ৰাপ্য অধিকাৰৰ কাৰণে সময়ে সময়ে একাংশ উদ্যোমী যুৱকে সশস্ত্ৰ সংগ্ৰাম কৰাৰ লগতে একাংশই আলোচনাৰ মাধ্যমেৰে আন্দোলন কৰি আহিছে ৷" সোমবাৰে বৰমাত বাক্সা জিলা এবছুৰ ১৯ সংখ্যক বাৰ্ষিক অধিবেশনত নিৰ্দিষ্ট বক্তা হিচাপে অংশগ্ৰহণ কৰি এনদৰে মন্তব্য় কৰে এবছুৰ সভাপতি দ্বীপেন বড়োৱে ৷ তেওঁ পুনৰ কয় যে বড়ো জাতিক এটা উন্নত জাতি কৰিবলৈ ৫৬ বছৰ আগতে বড়ো জাতিক মনে-প্ৰাণে ভাল পোৱা কিছু বড়ো ছাত্ৰ-ছাত্ৰীয়ে নিখিল বড়ো ছাত্ৰ সন্থা চমুকৈ এবছুৰ জন্ম দিছিল ৷ বৰ্তমান একাংশ লোকে এবছুৰ বেনাৰত থাকিয়েই বাহ বাহ লয় আৰু এবছুৰ কিছুমান প্ৰস্তাৱক সমালোচনা কৰা দেখা যায় বুলিও দোহাৰে ৷
বাক্সা জিলা এবছুৰ সভাপতি উমেশ দৈমাৰীৰ সভাপতিত্বত অনুষ্ঠিত মুকলি অধিবেশন মুকলি কৰে কেবিনেট মন্ত্ৰী ইউ জি ব্ৰহ্মই ৷ ভাষণ প্ৰসংগত তেওঁ কয় যে এবছুই জন্মলগ্নৰে পৰাই বড়ো জাতিৰ কাম কৰি আছে আৰু বডোফা উপেন্দ্ৰ নাথ ব্ৰহ্মৰ নেতৃত্বত নতুন প্ৰজন্মইয়ো তাৰেই আৰ্হিত কাম কৰিছে ৷ মাতৃভাষাৰে শিক্ষা গ্ৰহণ কৰাৰ প্ৰতি গুৰুত্ব আৰোপ কৰে ইউ জি ব্ৰহ্মই ৷ মুকলি অধিবেশনত উপস্থিত থাকি বি টি আৰৰ মুখ্য কাৰ্যবাহী সদস্য় প্ৰমোদ বড়োৱে বি টি আৰত থকা সকলো জাতি-জনগোষ্ঠীক মিলা-প্ৰীতিৰে বসবাস কৰিবলৈ আহ্বান জনায় ৷ ছাত্ৰ-ছাত্ৰী সকলে যাতে ৰাজনীতিত আহিব নোৱাৰে তাৰ বাবে অভিভাৱক সকলক তেওঁ সতৰ্ক হ'বলৈ আহ্বান জনায় ৷