বৰপেটা, ৬ এপ্ৰিল: চেঙাৰ গোমাফুলবাৰীত কংগ্ৰেছৰ বিশাল যোগদান কাৰ্যসূচী ৷ চেঙাত বিজেপি আৰু এ আই ইউ ডি এফত খহনীয়াৰ সৃষ্টি কৰি ৫ হাজাৰ সমৰ্থকসহ চেঙাৰ প্ৰাক্তন বিধায়ক লিয়াকৎ আলী খানৰ দুই পুত্ৰৰ কংগ্ৰেছত যোগদান ৷
লিয়াকৎ আলী খানৰ পুত্ৰ তথা বিজেপি জিলা যুৱ মৰ্চাৰ সম্পাদক আফতাদুৰ আলী খান আৰু তেওঁৰ ভাতৃ লিয়াদুৰ আলী খানৰো যোগদান কংগ্ৰেছত ৷ ইপিনে এ আই ইউ ডি এফৰ প্ৰতিষ্ঠাপক নেতা তথা এ আই ইউ ডি এফৰ কেন্দ্ৰীয় সমিতিৰ সম্পাদক ইলিমউদ্দিন দেৱানেও কংগ্ৰেছত যোগদান কৰে ৷
উল্লেখ্য যে ইলিমউদ্দিন দেৱানে ২০১১ চনত চেঙাৰ পৰা এ আই ইউ ডি এফৰ প্ৰাৰ্থী হিচাপে নিৰ্বাচনত প্ৰতিদ্বন্দ্বিতা কৰিছিল ৷ ধুবুৰী লোকসভা সমষ্টিৰ প্ৰাৰ্থী ৰকিবুল হুছেইনৰ হৈ নিৰ্বাচনী প্ৰচাৰ সভাখনত সৰুক্ষেত্ৰীৰ বিধায়ক তথা প্ৰদেশ কংগ্ৰেছৰ কাৰ্যকৰী সভাপতি জাকিৰ হুছেইন শিকদাৰ, বিধায়ক আব্দুৰ ৰহিম আহমেদ, বিধায়ক দিগন্ত বৰ্মন আৰু বৰপেটা জিলা কংগ্ৰেছৰ সভাপতি ৰফিকুল ইছলামে বিজেপি আৰু এ আই ইউ ডি এফৰ নেতাকৰ্মীসকলক কংগ্ৰেছলৈ আদৰণি জনায় ৷
ইপিনে নিৰ্বাচনী প্ৰচাৰ সভাখনত অংশ লৈ কংগ্ৰেছৰ কাৰ্যকৰী সভাপতি জাকিৰ হুছেইন শিকদাৰে চেঙাৰ এ আই ইউ ডি এফৰ বিধায়ক আশ্ৰাফুল হুছেইনেও কংগ্ৰেছত যোগদানৰ সম্ভাৱনাৰ কথা উল্লেখ কৰে ৷ চেঙাৰ বিধায়ক আশ্ৰাফুল হছেইনে কংগ্ৰেছত যোগদানৰ বাবে ফোনত যোগাযোগ কৰাৰ কথাও উল্লেখ কৰে জাকিৰ হুছেইন শিকদাৰে ৷