নিউজ ডেস্ক, 2 ফেব্ৰুৱাৰী: সন্ত্ৰাসবাদী সংগঠনসমূহৰ সৈতে মোকাবিলা কৰাৰ লক্ষ্যৰে ৰাষ্ট্ৰীয় তদন্ত সংস্থাই (এন আই এ) অন্যান্য কেন্দ্ৰীয় নিৰাপত্তা সংস্থাসমূহৰ চাইবাৰ বিষয়াসকলক প্ৰশিক্ষণ দিব ৷ যাতে তেওঁলোকক মুখ চিনাক্তকৰণৰ দ্বাৰা সন্ত্ৰাসবাদী ধৰা পেলোৱাৰ বাবে কেন্দ্ৰীয় তথ্যকোষৰ ব্যৱহাৰৰ বিষয়ে সচেতন কৰা হয় ।
নিৰাপত্তা সংস্থাটোৰ এগৰাকী জ্যেষ্ঠ বিষয়াই শুকুৰবাৰে ইটিভি ভাৰতক জনোৱা মতে, প্ৰশিক্ষণ কাৰ্যসূচীৰ সময়ত নিৰাপত্তাৰক্ষী বিষয়াসকলক ৰাষ্ট্ৰীয় সন্ত্ৰাসবাদ তথ্য সংযোজন আৰু বিশ্লেষণ কেন্দ্ৰ (এনটিডিএফএচি)ৰ বিষয়ে অৱগত কৰা হ’ব ।
শেহতীয়াকৈ কেন্দ্ৰীয় গৃহমন্ত্ৰী অমিত শ্বাহে আৰম্ভ কৰা এনটিডিএফএচিয়ে সন্ত্ৰাসবাদী সংগঠনসমূহৰ তথ্য, সন্ত্ৰাসবাদী আৰু তেওঁলোকৰ সহযোগীসকলৰ সবিশেষ তথ্য, তেওঁলোকৰ কেছ হিষ্ট্ৰী, ফিংগাৰপ্ৰিণ্ট, ভিডিঅ’, ছবি আৰু ছ’চিয়েল মিডিয়া প্ৰফাইলকে ধৰি তথ্য সংকলন কৰিছে ।
বিষয়াগৰাকীয়ে কয় যে প্ৰশিক্ষণ কাৰ্যসূচীৰ তাৰিখ আৰু স্থান অতি সোনকালে চক আউট কৰা হ’ব । ৰাজ্যিক চোৰাংচোৱা বিভাগৰ বিষয়াসকলকো প্ৰশিক্ষণ দিয়াৰ পৰিকল্পনা কৰা হৈছে । চাইবাৰ নিৰাপত্তাৰ বিষয়ত কেন্দ্ৰই ব্যাপক গুৰুত্ব প্ৰদান কৰি আহিছে বুলিও বিষয়াগৰাকীয়ে লগতে কয় ।
মন কৰিবলগীয়া যে কেন্দ্ৰীয় গৃহমন্ত্ৰী অমিত শ্বাহে সদায় এনে এক অনন্য তথ্যকোষৰ ওপৰত গুৰুত্ব দি আহিছে যিটো বিভিন্ন সংস্থাই সঠিক সমন্বয়ৰ সৈতে ব্যৱহাৰ কৰিব পাৰে । তাৎপৰ্যপূৰ্ণভাৱে বিত্তমন্ত্ৰী নিৰ্মলা সীতাৰমণে বৃহস্পতিবাৰে লোকসভাত ঘোষণা কৰা অন্তৱৰ্তীকালীন বাজেটতো চাইবাৰ নিৰাপত্তাৰ বিষয়টোৱে বহু বেছি গুৰুত্ব লাভ কৰিছে ।