حیدرآباد: چندریان 3 کے چاند پر اترتے ہی امریکی خلائی ایجنسی ناسا اور یورپی خلائی ایجنسی (ای ایس اے) کے سربراہ نے بھارت اور اسرو کو مبارکباد دی ہے۔ ناسا کے سربراہ بل نیلسن نے بدھ کے روز چاند پر خلائی جہاز کو کامیابی کے ساتھ سافٹ لینڈ کرنے والا چوتھا ملک ہونے پر بھارت کو مبارکباد دی اور کہا کہ امریکی خلائی ایجنسی اس مشن میں بھارت کا ساتھی بن کر خوش ہے۔ قابل ذکر ہے کہ بھارت کا چندریان 3 چاند کے جنوبی قطب کے قریب اترنے والا پہلا خلائی مشن بن گیا ہے۔ اس سے قبل روس کا قمری مشن لونا 25 خلائی جہاز کے چاند پر گر کر تباہ ہوگیا تھا۔ نیلسن نے سوشل میڈیا پر اسرو کو مبارکباد دیتے ہوئے لکھا کہ "چندریان 3 کے چاند کے جنوبی قطب پر کامیاب لینڈنگ پر اسرو کو مبارک، اور بھارت کو چاند پر سافٹ لینڈ کرنے والا چوتھا ملک ہونے پر مبارکباد، ہمیں اس مشن میں آپ کا ساتھی بننے پر خوشی ہے۔
یورپی خلائی ایجنسی (ای ایس اے) کے ڈائریکٹر جنرل جوزف ایسچباکر نے بھی بدھ کو بھارت کے مشن چندریان -3 کی کامیاب لینڈنگ پر اسرو کو مبارکباد دی۔ یوروپی اسپیس ایجنسی کے ڈائریکٹر نے ٹویٹ کیا اور بھارت کو اس تاریخی کامیابی پر مبارکباد دی۔ ایجنسی نے لکھاکہ اسرو اور چندریان-3 کی ٹیم کو مبارکباد۔ ایسچباکر نے یہ بھی ٹویٹ کیا کہ ناقابل یقین، منفرد.. اسرو، چندریان 3 اور پورے بھارت کو مبارک ہو۔ انہوں نے مزید لکھا کہ بہت خوب، میں اس عظیم کامیابی سے بہت متاثر ہوں۔ ہم اس سے سیکھ رہے ہیں اور قابل قدر مہارت سے گزر رہے ہیں۔ ایک مضبوط بین الاقوامی پارٹنر ایک مضبوط پارٹنر ہے۔ برطانیہ کی خلائی ایجنسی نے بھی ٹویٹ کیا کہ تاریخ رچ گئی ہے۔ اسرو کو مبارک ہو! ایجنسی نے اس ٹویٹ کے ساتھ بھارتی پرچم اور چاند کی تصویر بھی منسلک کی ہے۔
یہ بھی پڑھیں:
- بھارت نے تاریخ رقم کردی، چندریان تھری کی چاند پر کامیاب سافٹ لینڈنگ
- چندریان 3 کی کامیاب لیڈنگ پر وزیراعظم مودی کی سائنس دانوں کو مبارکباد
قابل ذکر ہے کہ بھارت کا چندریان تھری نے 23 اگست 2023 کو چاند کے جنوبی قطب کے علاقے میں کامیابی سے اتر کر تاریخ رقم کی ہے۔ اس کے ساتھ ہی ہندوستان چاند کی سطح پر سافٹ لینڈنگ کرنے والا دنیا کا چوتھا ملک اور قمری جنوبی قطب کے علاقے میں سافٹ لینڈنگ کرنے والا پہلا ملک بن گیا ہے۔ واضح رہے کہ بھارت کا یہ تیسرا قمری مشن تھا۔ جو کہ چندریان تھری کے نام سے موسوم ہے اور 41 دن کے سفر کے بعد 23 اگست کی شام 6.04 بجے چاند کے جنوبی قطب پر سافٹ لینڈ کیا۔ اس کے ساتھ ہی بھارت امریکہ، چین اور سوویت یونین کے بعد چاند کی سطح پر سافٹ لینڈنگ کرنے والا چوتھا ملک بن گیا ہے۔
