مرکزی وزیر ریل نے کٹرا میں واقع ماتا ویشنو دیوی ریلوے اسٹیشن کا دورہ کیا

مرکزی وزیر ریل اشونی وشنو نے آج کٹرا ماتا ویشنو دیوی ریلوے اسٹیشن کا دورہ کیا اور دو اضافی مسافر پلیٹ فارمز اور پلیٹ فارم لائنوں کی سنگ بنیاد رکھی اور ریلوے اسٹیشن پر واشنگ اسٹیشن کے لیے واٹر سپلائی ٹینک کا افتتاح کیا۔

اس موقع پر انہوں نے میڈیا نمائندوں سے کہا کہ ادھمپور، سرینگر اور بارہمولہ ریل پروجیکٹ ملک کے لیے ایک اہم پروجیکٹ ہے، یہ وادی کشمیر کو ملک کے مختلف حصوں سے ملانے کا واحد ریل لنک ہے جس پر اس وقت تیزی سے کام جاری ہے اور جلد ہی عوام کے لیے اسے جاری کیا جائے گا۔ وزیر ریلوے نے کسانوں و دیگر احتجاج کرنے والوں سے بھی اپیل کیا کہ ریلوے قوم کی ملکیت ہے اور ریلوے (ٹرینوں) کی نقل و حرکت کو متاثر نہ کریں۔

آپ کو بتادیں کہ وزیر داخلہ امت شاہ کے اقدام کے تحت مرکزی وزراء کا ایک گروپ 18 جنوری سے جموں و کشمیر کے دورہ پر ہے، تاکہ آرٹیکل 370 کی منسوخی کے مثبت اثرات اور اس کے ذریعہ اٹھائے گئے ترقیاتی اقدامات کے بارے میں عوام کو آگاہ کیا جائے۔