سنبھل:ملک کی دوسری ریاستوں کی طرح اتر پردیش میں بھی لوک سبھا انتخابات کے مدنظر سیاسی گہماگہمی زوروں پر جاری ہے۔ بی جے پی، ایس پی اور بی ایس پی سمیت تمام سیاسی جماعتیں ووٹرز کی توجہ اپنی اپنی طرف مبذول کرانے کی کوشش میں مصروف ہیں۔ اتر پردیش کے سنبھل پارلیمانی حلقہ میں انڈیا اتحاد کے امیدوار ضیاءالرحمن اور بی جے پی کے امیدوار پرمیشور لال سینی کے درمیان دلچسپ مقابلہ ہونے کا امکان ہے۔
ای ٹی وی بھارت اردو سے بات کرتے ہوئے انڈیا اتحاد کے امیدوار ( سماج وادی پارٹی) ضیاء الرحمان برق نے کہا کہ وہ جن ایشوز پر الیکشن لڑ رہے ہیں وہ سب عوام کے مسائل ہیں۔عوام اس وقت پریشان حال ہے۔مرکز میں بی جے پی کی قیادت والی مرکزی حکومت عوام کی پریشانیوں کو دور کرنے کے لئے کبھی بھی خاطر خواہ قدم نہیں اٹھائی ہے۔
ایس پی کے امیدوار نے کہاکہ ہم مہنگائی، بے روزگاری جیسے تمام اہم مسائل کو لے کر عوام کے درمیان جائیں گے۔ہمیں عوام کی پریشانیوں کا علم ہے۔ تعلیم، صحت اور بہتر مستقبل کے لیے عوام سے ووٹ مانگ رہے ہیں۔ آج ملک بھر میں مہنگی تعلیم کی وجہ سے لوگ پریشان ہیں۔ حکومت عوام کو روزگار نہیں دے رہی، ہم بہتر مخلوط حکومت بنائیں گے۔
یہ بھی پڑھیں:سنبھل پارلیمانی حلقہ سے بی جے پی کے امیدوار کو اپنی جیت کا یقین - Lok sabha Election 2024
ان کا مزید کہنا تھا کہ ملک کے وزیر اعظم نریندر مودی نے کہا تھا کہ اگر مرکز میں کانگریس کی حکومت آئی تو آپ کی جائیداد کو مسلمانوں کو دے دیں گے ۔بھلا کبھی ایسا ہوا ہے۔بی جے پی عام لوگوں کو گمراہ کر رہی ہے کیونکہ ان کے پاس ترقیاتی منصوبے نہیں ہیں۔وہ صرف نفرت کی سیاست کرتے ہیں ۔
