حیدرآباد: تلنگانہ کے وزیراعلی ریونت ریڈی نے مرکزکی بی جے پی حکومت پر ریزرویشن پالیسی کوختم کرنے کا الزام لگایا۔
بی جے پی کے دس سالہ دور حکومت پر عوامی چارج شیٹ جاری کی گئی۔ اس موقع پر میڈیا سے بات کرتے ہوئے انہوں نے کہا کہ ان انتخابات میں بی جے پی اگرکامیاب ہوتی ہے تو وہ ریزرویشن کے حقوق کو ختم کردے گی۔ اگر کانگریس اقتدار میں آتی ہے تو ریزرویشن کو جاری رکھا جائے گا۔
انہوں نے کہاکہ جو لوگ ریزرویشن چاہتے ہیں وہ کانگریس کو ووٹ دیں اور جو نہیں چاہتے وہ بی جے پی کو ووٹ دیں۔ انہوں نے بی جے پی پر آر ایس ایس کے ایجنڈے کو نافذ کرنے کا الزام لگایا اور کہا کہ مرکزی حکومت سی اے اے کو لاگو کرنا چاہتی ہے اور آرٹیکل 370 کو منسوخ کردیتی ہے۔
انہوں نے کہا کہ بی جے پی ایس سی اور ایس ٹی او بی سی تحفظات کو منسوخ کرنے کی سازش کر رہی ہے۔ انہوں نے کہا کہ آر ایس ایس کا نظریہ تحفظات کو ختم کرنے کا ہے۔ انہوں نے مودی پر الزام لگایا کہ انہوں نے قرض کے بحران میں ملک کو دھکیل دیا ہے۔ 2014 سے اب تک مودی نے 113 لاکھ کروڑ کا قرض حاصل کیا ہے۔
ریونت ریڈی نے کہا کہ ملک پر 168 لاکھ کروڑ روپیوں کے قرض کا بوجھ ہے۔ اور مرکزی حکومت جی ایس ٹی کے نام پر ٹیکس لگا کر لوٹ رہی ہے۔ مودی نے بچوں کی پنسلوں پر بھی جی ایس ٹی لگا دیا ہے۔ مودی حکومت اڈانی، امبانی کے دباؤ کے سامنے جھک گئی ہے۔ 10 سالوں میں حکومت نے کئی سرکاری اداروں کو کارپوریٹ اداروں کو فروخت کردیا ہے۔
پٹرول کی قیمت جو 50 روپے تھی آج 110 روپے ہو گئی ہے۔ انہوں نے مزید کہا کہ اگر مودی اس بار بھی برسراقتدار آئیں گے تو ملک تباہ ہو جائے گا، بی جے پی نے ملک کی دولت کو لوٹا ہے۔ انہوں نے کہا کہ کانگریس ملک اور اس کی دولت کی حفاظت کے لیے لڑ رہی ہے۔
انہوں نے کہا کہ مودی حکومت نے دس سالوں میں 20 کروڑ نوکریاں فراہم کرنے کا وعدہ کیا تھا لیکن صرف 7 لاکھ نوکریاں دی گئی ہیں، انہوں نے الزام لگایا کہ دہلی کی سرحد پر 16 ماہ تک لاکھوں کسانوں نے دھرنا دیا۔
اس پروگرام میں آل انڈیا کانگریس کمیٹی کے کئی لیڈروں نے حصہ لیا جس میں کانگریس کی سکریٹری دیپاداس منشی، وزراء کومٹ ریڈی، ملو بھٹی وکرامارکر، پونم پربھاکر اور کئی دیگر کانگریسی لیڈروں نے اس پروگرام میں شرکت کی۔
یہ بھی پڑھیں:
