నడిసంద్రంలో చైనా వ్యక్తికి కార్డియాక్ అరెస్ట్​.. భారత్​​ డేరింగ్ ఆపరేషన్.. చిమ్మచీకట్లోనే..

Indian Coast Guard Evacuates Chinese National : నడి సుమద్రంలో ఇండియన్ కోస్ట్​ గార్డ్​ డేరింగ్​ అపరేషన్​ చేపట్టింది. అరేబియా సముద్రంలో ఓ నౌకలో ప్రయాణిస్తున్న చైనా పౌరుడు తీవ్ర అనారోగ్యానికి గురయ్యారు. దీంతో ఆ నౌక సిబ్బంది ముంబయిలోని మారిటైమ్​ రెస్క్యూ కోఆర్డినేషన్‌ సెంటర్‌కు అత్యవసర సందేశం పంపారు. దీంతో రంగంలోకి దిగిన కోస్ట్​గార్డ్​.. బాధితుడిని సురక్షింతంగా తీరంలోని సమీప ఆస్పత్రికి తరలించింది.  

ఇదీ జరిగింది..
పనామా జెండాతో ఉన్న ఎంవీ డాంగ్‌ ఫాంగ్‌ కాన్‌ టాన్‌ నంబర్‌ 2 రీసర్చ్‌ నౌక.. చైనా నుంచి అరేబియా సముద్రం మీదుగా యూనైటెడ్​ అరబ్​ ఎమిరేట్స్​- యూఏఈకి వెళ్తోంది. బుధవారం రాత్రి ఈ నౌకలో పనిచేస్తున్న సిబ్బంది యిన్‌ వీగ్‌యాంగ్‌ కార్డియాక్ అరెస్ట్‌కు గురయ్యారు. ఛాతినొప్పితో ఇబ్బంది పడ్డారు. దీంతో నౌక సిబ్బంది సమీప తీర ప్రాంతమైన ముంబయిలోని మారిటైమ్‌ రెస్క్యూ కోఆర్డినేషన్‌ సెంటర్‌కు మెడికల్​ ఎమర్జెన్సీ సహాయం కావాలని సందేశం పంపారు. అనంతరం రెస్యూ సిబ్బంది వచ్చేదాగా టెలీమెడిసిన్​ ద్వారా అత్యవసర వైద్యానికి సలహాలు ఇచ్చారు.

సందేశం వచ్చిన వెంటనే అప్రమత్తమైన ఇండియన్ కోస్ట్‌గార్డ్‌ సిబ్బంది బాధితుడిని అత్యవసరంగా ఆసుపత్రికి చేర్చేందుకు ఏఎల్‌హెచ్‌ ఎంకే-3 (అధునాతన, తేలికపాటి) హెలికాప్టర్‌తో ఆగస్టు 16-17 రాత్రి బయలుదేరారు. ఆ సమయంలో చైనా నౌక అరేబియా సముద్రంలో తీరానికి దాదాపు 200 కి.మీల దూరంలో ఉంది. వాతావరణ పరిస్థితులు ప్రతికూలంగా ఉన్నప్పటికీ.. కోస్ట్‌గార్డ్‌ చిమ్మచీకట్లో ధైర్యంగా ఈ ఆపరేషన్‌ చేపట్టింది. అర్ధరాత్రి సమయంలో నౌకలో నుంచి వీగ్‌యాంగ్‌ను ఎయిర్‌లిఫ్ట్‌ చేసింది. అనతంరం హెలికాప్టర్‌లోనే ప్రథమ చికిత్స అందించి.. తీరంలోని సమీప ఆసుపత్రికి తరలించింది. ఈ మేరకు భారత రక్షణ శాఖ గురువారం ఓ ప్రకటనలో తెలిపింది.