Ganesh Immersion in Hyderabad 2023 : గణేశ్​ నిమజ్జన ఏర్పాట్లు ఈసారి మరింత పెంచాం: మంత్రి తలసాని

Ganesh Immersion in Hyderabad 2023 : హైదరాబాద్ నగరంలో గణేశ్​ నిమజ్జనానికి ఎలాంటి ఇబ్బందులు తలెత్తకుండా.. ప్రభుత్వం పకడ్బందీ ఏర్పాట్లు చేసిందని మంత్రి తలసాని శ్రీనివాస్​ యాదవ్​(Talasani) పేర్కొన్నారు. హైదరాబాద్​లో రేపటి నుంచి వినాయక నిమజ్జనాలు ప్రారంభం కానున్న వేళ.. హైదరాబాద్ నెక్లెస్ రోడ్​లో గణేశ్​ నిమజ్జన ఏర్పాట్లను జీహెచ్​ఎంసీ అధికారులతో కలిసి మంత్రి పరిశీలించారు. ఈ సంవత్సరం నిమజ్జనం ఏర్పాట్లను మరింతగా పెంచినట్లు తెలిపారు. జీహెచ్​ఎంసీ పరిధిలో 90 వేల వినాయక ప్రతిమలను ప్రతిష్టించినట్లు మంత్రి తలసాని వివరించారు. ఎవరు, ఎక్కడ నిమజ్జనం చేయాలో.. ముందుగానే అందరికీ సమాచారం అందించామన్నారు. గణేశ్​ ఉత్సవ సమితి సభ్యులకు ప్రభుత్వం అండగా ఉంటుందని స్పష్టం చేశారు. నిమజ్జనం ప్రశాంతంగా జరిగేలా అందరూ సహకరించాలని విజ్ఞప్తి చేశారు.

ఈ క్రమంలోనే మహిళా రిజర్వేషన్​ బిల్లుపై కేంద్రం ఆమోదం సరైన నిర్ణయమేనని తలసాని పేర్కొన్నారు. మహిళా రిజర్వేషన్​ బిల్లుపై.. బీఆర్​ఎస్ మొదటి నుంచీ పోరాటం చేస్తుందని గుర్తు చేశారు. తెలంగాణపై అమిత్​షా, మోదీ ఇష్టమొచ్చినట్లుగా మాట్లాడుతున్నారని.. కేంద్రమంత్రిగా ఉండి సాధారణ వ్యక్తిగా వ్యాఖ్యలు చేయడం అమిత్​షాకు తగదని హితవు పలికారు. మరోవైపు.. రజాకార్​ చిత్రంపైనా తలసాని స్పందించారు. తెలంగాణ సెంటిమెంట్​కు వ్యతిరేకంగా సినిమాలు వస్తే ఊరుకోమని హెచ్చరించారు. రజాకర్​ చిత్రంలో ఏవైనా అభ్యంతరకర సన్నివేశాలు ఉంటే.. సెన్సార్ బోర్డుకు ఫిర్యాదు చేస్తామన్నారు. మంత్రితో పాటుగా  జీహెచ్ఎంసీ కమిషనర్ రోనాల్డ్ రోస్, హైదరాబాద్ పోలీస్ కమిషనర్ సీవీ ఆనంద్ తదితరులు హాజరయ్యారు.