India vs Pakistan : పాకిస్థాన్పై టీమ్ ఇండియా అద్భుత విజయం సాధించింది. దాయాదుల మధ్య చివరి బంతి వరకూ సాగిన ఉత్కంఠభరిత మ్యాచ్లో భారత్ 4 వికెట్ల తేడాతో గెలుపొందింది. అన్ని విభాగాల్లో రాణించి చిరకాల ప్రత్యర్థిపై విజయాల పరంపర కొనసాగించింది. మెల్బోర్న్ వేదికగా జరిగిన ఈ మ్యాచ్లో విరాట్ కోహ్లీ (82*) ఒంటి చేత్తో టీమ్ఇండియాను గెలిపించాడు. 31 పరుగులకే 4వికెట్లు కోల్పోయి పీకల్లోతు కష్టాల్లో పడిన టీమ్ఇండియాను విరాట్ కోహ్లీ-హార్దిక్ పాండ్య ఆదుకున్నారు. ఐదో వికెట్కు శతక భాగస్వామ్యం జోడించారు. ఆ తర్వాత పాండ్య ఔటవగా.. కోహ్లీ చివరి వరకూ క్రీజ్లో ఉండి జట్టును విజయతీరాలకు చేర్చాడు. దీంతో టీమ్ఇండియా 4 వికెట్ల తేడాతో విజయం సాధించింది. చివరి ఓవర్లలో ఒత్తిడి కారణంగా పాకిస్థాన్ చేసిన తప్పిదాలు టీమ్ఇండియాకు వరంలా మారాయి. పాక్ బౌలర్లు హరిస్ రవుఫ్(2), నసీం షా(1) నవాజ్(2) వికెట్లు తీశారు.
మొదట టాస్ గెలిచి బౌలింగ్ ఎంచుకున్న భారత్.. పవర్ ప్లేలో పాకిస్థాన్ను కట్టిడి చేసింది. ఆ తర్వాత భారత బౌలర్ల ధాటికి పాక్ నిలబడలేక పోయింది. ఆ తర్వాత పుంజుకున్న పాక్.. నిర్ణీత ఓవర్లలో 8 వికెట్ల నష్టానికి 159 పరుగులు చేసింది. ఈ మ్యాచ్తో వరల్డ్ కప్లో మొదటి సారి ఆడుతున్న టీమ్ ఇండియా యువ బౌలర్ అర్షదీప్ సింగ్ అద్భుత ప్రదర్శన చేశాడు. 32 పరుగులు సమర్పించి 3 వికెట్లు పడగొట్టాడు. హార్దిక్ పాండ్యా(3) వికెట్లతో అద్భుత ప్రదర్శన చేశాడు. మొత్తం నాలుగు ఓవర్లు వేసిన హార్దిక్.. 20 పరుగులు ఇచ్చి 3 వికెట్లు తీశాడు. షమీ, భువనేశ్వర్ చెరో ఒక వికెట్ పడగొట్టారు. ఒక పరుగుకే.. మొదటి వికెట్ కోల్పోయింది. ఓపెనర్ బాబర్ అజామ్(0)ను పెవిలియన్ పంపించింది టీమ్ ఇండియా. నాలుగో ఓవర్లో 15 పరుగుల వద్ద మరో కీలక బ్యాటర్ మహ్మద్ రిజ్వాన్(4) అర్ష్దీప్ సింగ్ బౌలింగ్లో క్యాచ్ ఔట్ అయ్యాడు. ఆ తర్వాత బ్యాటింగ్కు దిగిన షాన్ మసూద్, ఇఫ్తికార్ అహ్మద్(51) చెలరేగిపోయి ఆడారు. మరో బ్యాటర్ షాన్(52) పరుగులు చేసి నాటౌట్గా నిలిచాడు.
అక్షర్ పటేల్ వేసిన 12వ ఓవర్లో ఇఫ్తికార్ అహ్మద్ మూడు సిక్స్లతో చెలరేగిపోయాడు. అనంతరం మహ్మద్ షమీ బౌలింగ్లో ఎల్బీడబ్ల్యూ అయ్యాడు. తర్వాత క్రీజులోకి వచ్చిన సాహబ్ ఖాన్(5), హైదర్ అలీ(2), మహ్మద్ నవాజ్(9) పేలవ ప్రదర్శన చేశారు. అర్ష్దీప్ సింగ్ బౌలింగ్లో అసిఫ్ అలీ (2) షాట్కు ప్రయత్నించగా.. బంతి నేరుగా దినేశ్ కార్తిక్ చేతిలోకి వెళ్లింది. దీంతో పాకిస్థాన్ 120 పరుగుల వద్ద ఏడో వికెట్ కోల్పోయింది. ఆ తర్వాత షహీన్ అఫ్రిది(16) పరుగులు చేసి భువనేశ్వర్ బౌలింగ్లో ఔట్ అయ్యాడు.
ఇవీ చదవండి : T20 World Cup : పాక్కు స్లో స్టార్ట్.. అభిమానులతో హోరెత్తిన స్టేడియం