వర్షాకాలంలో నీటిని తోడేందుకు పల్లికొండ లిఫ్ట్ పూర్తైందని, పైప్లైన్ చిన్న చిన్న మరమ్మతులు వారం రోజుల్లో పూర్తవుతాయని రోడ్లు, భవనాల శాఖ మంత్రి ప్రశాంత్ రెడ్డి(minister prashanth reddy) అన్నారు. ఈ లిఫ్ట్ ద్వారా సుమారు 7 గ్రామాలకు సాగునీటిని అందించడమే లక్ష్యమని పేర్కొన్నారు. నిజాంసాగర్ పాత కాల్వ ద్వారా జానకంపేట మల్లాడి చెరువు నింపే ఫీడర్ ఛానల్ను మంత్రి పరిశీలించారు. నిజామాబాద్ జిల్లా బాల్కొండ నియోజకవర్గంలోని భీంగల్, వేల్పూర్ మండలాల్లో గురువారం ఆయన పర్యటించారు.
క్షేత్ర స్థాయిలో పరిశీలన
పైప్లైన్ వేయాల్సిన ఫీడర్ చానల్ స్థలాన్ని మంత్రి క్షేత్ర స్థాయిలో పరిశీలించారు. నిధుల మంజూరుకు కృషి చేస్తానని గ్రామస్థులకు హామీ ఇచ్చారు. అనంతరం పల్లికొండ ప్రాజెక్టు కింద ఉన్న లిఫ్ట్, మోటర్ల పనితీరును అధికారులను అడిగి తెలుసుకున్నారు. ఈ వర్షాకాలంలో నీటిని తోడేందుకు సిద్ధంగా ఉండాలని ఇరిగేషన్ శాఖ అధికారులను మంత్రి ఆదేశించారు.
బైక్పై తిరుగుతూ...
ముఖ్యమంత్రి కేసీఆర్ సూచన మేరకు లిఫ్ట్ల ద్వారా చెరువులను నింపుకోవాలనే ఆలోచనతో నియోజకవర్గంలోని వేముగంటి, పల్లికొండ ఎత్తిపోతల మోటార్లని పరిశీలించినట్లు మంత్రి చెప్పారు. పల్లికొండ ఎత్తిపోతల పథకం ద్వారా దిగువన ఉన్న సుమారు 7 గ్రామాల చెరువులు నింపేందుకు ప్రణాళికలు సిద్ధం చేయాలని మంత్రి సూచించారు. అనంతరం పల్లికొండ, బాచన్ పల్లి, ముచ్కూర్ చెరువులు పరిశీలించారు. చెరువు కట్టలపై బైక్పై కలియతిరుగుతూ చెరువుల నాణ్యత, నీటిని నింపుకునేందుకు వీలుపడే ఫీడర్ ఛానళ్లను పరిశీలించారు.
అనంతరం మార్గమధ్యలో ఫీవర్ సర్వే చేస్తున్న ఆశావర్కర్లు, ఏఎన్ఎంలను పలు వివరాలు అడిగి తెలుసుకున్నారు. ఆయా గ్రామాల్లో కరోనా సోకిన వారి వివరాలపై ఆరా తీశారు. లాక్డౌన్ పక్కాగా అమలయ్యేలా సర్పంచ్లు, వార్డు మెంబర్లు చూడాలని ఆదేశించారు.
ఇదీ చదవండి: Covid Query: ఫోన్‌కాల్‌ దూరంలో... వైద్య సలహాలు!
