Candidate Who Has Swallowed OMR Seat In Nizamabad: టీఎస్పీఎస్సీ నిర్వహించిన డివిజనల్ అకౌంట్స్ ఆఫీసర్ రాత పరీక్షలో ఓ అభ్యర్థి ఓఎంఆర్ షీట్ను మింగి మాల్ ప్రాక్టీస్కు పాల్పడ్డాడు. ఈ ఘటన నిజామాబాద్ జిల్లా కేంద్రంలోని బోర్గాం(పీ) లోని ఉన్నత పాఠశాల పరీక్షా కేంద్రంలో జరిగింది. ఈ విషయంపై అధికారులు పోలీసులకు ఫిర్యాదు చేశారు. నిందితుడిని అదుపులోకి తీసుకున్నారు.
పోలీసులు తెలిపిన వివరాల ప్రకారం.. నిర్మల్ జిల్లాకు చెందిన ఓ బ్యాంకు ఉద్యోగి అబ్దుల్ ముఖీద్.. డివిజనల్ అకౌంట్స్ పరీక్షకు హాజరయ్యాడు. పరీక్ష కేంద్రంలో ఇన్విజిలేటర్ అభ్యర్థులకు ఓఎంఆర్ షీట్లను అందజేశారు. పరీక్షకు హాజరుకాని అభ్యర్థులకు కేటాయించిన స్థానాల్లో సైతం పత్రాలను ఉంచారు. అప్పటికే పరీక్ష రాస్తున్న ముఖీద్ తనకు ఇచ్చిన ప్రశ్నలలో చాలా వరకు తప్పులు రాయడంతో.. గైర్హాజరైన అభ్యర్థి ఓఎంఆర్ పత్రాన్ని ఇన్విజిలేటర్కు తెలియకుండా దొంగలించాడు. దొంగలించిన ఓఎంఆర్ పత్రంతో మళ్లీ పరీక్షను రాశాడు.
ఇప్పుడు తన ఓఎంఆర్ షీట్ను ఎవరికీ తెలియకుండా అక్కడే ముక్కలు చేసి.. నమిలి మింగేశాడు. పరీక్ష సమయం అయిపోవడంతో ఇన్విజిలేటర్లు పరీక్ష పత్రాలను తీసుకునే క్రమంలో ఒక ఓఎంఆర్ షీట్ కనిపించట్లేదని గుర్తించారు. వెంటనే ఉన్నతస్థాయి అధికారులకు ఫిర్యాదు చేయడంతో ఆ ఎగ్జామ్ హాల్లోని సీసీ కెమెరాలో రికార్డు అయిన పుటేజినీ పరిశీలించారు.
Candidate Stole OMR Seat In Divisional Accounts Officer Exam: దీంతో అధికారులకు విస్తుపోయే నిజం తెలిసింది. పరీక్షకు హాజరైన అబ్దుల్ ముఖీద్.. గైర్హాజరైన అభ్యర్థి ఓఎంఆర్ షీటును దొంగిలించి.. అందులో సమాధానాలు నింపాడు. తన పత్రాన్ని చిన్న చిన్న ముక్కలుగా చేసి మింగేశాడని అధికారులు గుర్తించారు. టీఎస్పీఎస్సీ తప్పుడు సమాధానాలకు నెగెటివ్ మార్కులను పెట్టింది. ఆ భయంతోనే తప్పుగా రాసిన తన ఓఎంఆర్ షీట్ను చింపి.. రాని అభ్యర్థి ఓఎంఆర్ పత్రంలో పరీక్ష రాసి ఉంటాడని అధికారులు భావించారు.
వెంటనే అక్కడ ఉన్న అధికారులు నాలుగో పట్టణ పోలీస్ స్టేషన్కు సమాచారం అందించారు. అబ్దుల్ ముఖీద్ను అదుపులోకి తీసుకొని విచారించగా.. తానే ఓఎంఆర్ షీట్ను మింగినట్లు ఒప్పుకున్నాడు. ముఖీద్పై కేసు నమోదు చేసి.. దర్యాప్తు చేపట్టినట్లు పోలీసులు తెలిపారు.
డివిజనల్ అకౌంట్స్ ఆఫీసర్స్ పరీక్షకు 63శాతం అభ్యర్థులు హాజరు: ఆదివారం టీఎస్పీఎస్సీ నిర్వహించిన డివిజనల్ అకౌంట్స్ ఆఫీసర్స్ గ్రేడ్-2 పోస్టుల భర్తీకి జరిగిన రాత పరీక్షలో 63శాతం మంది హాజరయ్యారు. ఈ పరీక్షకు 1,06,253 మంది అభ్యర్థులు దరఖాస్తు చేయగా.. ఆదివారం ఉదయం పేపర్-1 పరీక్షకు 67,830 మంది, మధ్యాహ్నం పేపర్-2కు 66,903 మంది హాజరయ్యారని టీఎస్పీఎస్సీ వెల్లడించింది. రాష్ట్రవ్యాప్తంగా 241 పరీక్షాకేంద్రాల్లో పరీక్ష ప్రశాంతంగా జరిగిందని టీఎస్పీఎస్సీ కార్యదర్శి అనితా రామచంద్రన్ పేర్కొన్నారు. రెండు మాల్ ప్రాక్టీస్ కేసులు నమోదయ్యాయని ప్రకటించారు.
ఇవీ చదవండి:
