Munugode Bypoll Arrangements: ఈ నెల 3న జరగనున్న మునుగోడు ఉప ఎన్నిక ప్రచార ఘట్టం ముగియడంతో పోలింగ్ ఏర్పాట్లను ఈసీ వేగవంతం చేసింది. నియోజకవర్గంలో 2,41,805 మంది ఓటర్లుండగా.. ఇందులో లక్షా 21,672 మంది పురుషులు.. లక్షా 20వేల 126 మంది మహిళలు.. ఇతరులు ఏడుగురు ఉన్నారు. ఉప ఎన్నికకు 119 కేంద్రాల్లోని 298 పోలింగ్ బూతులు ఏర్పాటు చేయగా.. అర్బన్ పరిధిలో 35, రూరల్ పరిధిలో 263 పోలింగ్ కేంద్రాలున్నాయి.
ఈసారి తొలిసారి ఆధునీకరించిన ఓటరు గుర్తింపు కార్డులు అందజేస్తుండగా.. ఓటరు స్లిప్పుల పంపిణీ ఇప్పటికే పూర్తైంది. ఆన్లైన్లోనూ ఈ స్లిప్లను అందుబాటులో ఉంచారు. అన్ని పోలింగ్ కేంద్రాల్లో షామియానాలతో పాటు వృద్ధులకు వీల్ ఛైర్లనూ ఏర్పాటు చేస్తున్నారు. తాగునీటిని సమకూరుస్తున్నారు. సాయంత్రం 6 గంటల లోపల కేంద్రంలోకి వచ్చే ప్రతి ఒక్క ఓటరు.. ఎంత రాత్రైనా ఓటు వేసే విధంగా చర్యలు చేపట్టారు.
నవంబరు 3న ఉదయం 7 గంటల నుంచి సాయంత్రం 6 గంటల వరకు పోలింగ్ జరగనుంది. అదే రోజు ఉదయం ఐదున్నర గంటలకు మాక్ పోలింగ్ ప్రారంభమవుతుంది. అన్ని కేంద్రాలకు పంపిణీ చేయడానికి 1192 ఈవీఎంలు, 596 వీవీప్యాట్లు, 596 కంట్రోల్ యూనిట్లను ఏర్పాటు చేశారు. ఎక్కడైనా ఈవీఎంలలో సమస్య వస్తే వెంటనే సరిచేయడానికి పెద్ద ఎత్తున ఇంజినీర్లను సైతం అందుబాటులో ఉంచారు. ఇప్పటికే జిల్లా ఎన్నికల అధికారి స్థాయిలో ఈవీఎంల ర్యాండమైజేషన్ ప్రక్రియ పూర్తయింది.
ఎన్నికల నిర్వహణకు 373 మంది పీవో, 373 మంది ఏపీవో, 740 జీపీవోలతో పాటు సుమారు రెండు వేల మంది సిబ్బందిని వినియోగిస్తున్నారు. నోడల్ అధికారులు 16 మంది విధులు నిర్వహిస్తున్నారు. వీరందరికీ పోలింగ్రోజు, అంతకుముందు రోజు రాత్రి ఆయా కేంద్రాల్లో వసతులకు ఇబ్బందుల్లేకుండా ఇప్పటికే క్షేత్రస్థాయిలో అన్ని చర్యలు పూర్తి చేశారు. ప్రత్యేకంగా రూపొందించిన యాప్ ద్వారా ప్రతి గంటకూ నేరుగా పోలింగ్ కేంద్రం నుంచి ఓటింగ్ శాతం నమోదు చేయనున్నారు.
కేంద్రబలగాలతో పహారా: మద్యం, నగదు పంపిణీ విచ్చలవిడిగా పంపిణీ చేస్తున్నారన్న ఫిర్యాదులపై ప్రత్యేక బృందాలతో నిఘా ఏర్పాటు చేశారు. ఎన్నికల విధుల్లో 3,366 మంది రాష్ట్ర పోలీసులు.. 15 కంపెనీల కేంద్ర బలగాలు భద్రతను పర్యవేక్షిస్తున్నాయి. నియోజకవర్గానికి వచ్చే అన్నిదారుల్లో చెక్పోస్టులను ఏర్పాటు చేసి.. క్షుణ్నంగా తనిఖీలు జరుపుతున్నారు.
నియోజకవర్గంలోని 49 ప్రాంతాల్లో 105 సమస్యాత్మక పోలింగ్ కేంద్రాలను గుర్తించిన అధికారులు.. పోలీసు యంత్రాంగంతో కలిసి ఎలాంటి ఘటనలు జరగకుండా జాగ్రత్తలు తీసుకుంటున్నారు. అత్యాధునిక కెమెరాలతో చెక్పోస్టులు, సర్వైలెన్స్ టీమ్లు పర్యవేక్షిస్తున్నాయి. ఇక్కడ తీసిన వీడియో నేరుగా నల్గొండ కలెక్టరేట్లోని కంట్రోల్ రూమ్లో ప్రత్యక్ష ప్రసారం అవుతుంది. దీంతో ఎక్కడా అక్రమాలు చోటు చేసుకునే అవకాశం ఉండదు. తహసీల్దార్, నాయబ్ తహసీల్దార్ ఆధ్వర్యంలో ప్రత్యేక బృందాలు, జనరల్ పరిశీలకులు, వ్యయ పరిశీలకులతో ఎప్పటికప్పుడు క్షేత్రస్థాయిలో పరిస్థితిని సమీక్షిస్తున్నారు.
ఇవీ చూడండి..
'ప్రలోభాలకు ఆస్కారం ఉండొద్దు.. అభ్యర్థుల వ్యయంపై నిఘా ఉంచండి'
'ఆమ్ ఆద్మీకి భారీగా ముడిపులిచ్చా'.. సుకేశ్‌ చంద్రశేఖర్‌ సంచలన ఆరోపణలు
