Thummala MLA Ticket Issue : పాలేరు టికెట్ ఆశించి భంగపడ్డ మాజీ మంత్రి తుమ్మలకు మద్దతుగా ఉమ్మడి ఖమ్మం జిల్లాలో అభిమాన సంద్రం పోటెత్తింది. తుమ్మలకు మేమున్నామంటూ అభిమానులు, కార్యకర్తలు కొండంత అండగా నిలిచారు. బీఆర్ఎస్ అభ్యర్థుల జాబితాలో చోటు దక్కకపోవడంతో.. తీవ్ర అసంతృప్తితో ఉన్న తుమ్మల శుక్రవారం ఖమ్మం జిల్లాకు వచ్చారు. ఈ సందర్భంగా తుమ్మలకు మద్దతుగా భారీ సంఘీభావ ర్యాలీ నిర్వహించి అభిమాన నేతకు, అభివృద్ధి ప్రదాతకు దారి పొడవునా బ్రహ్మరథం పట్టారు.
Ex Minister Thummala Huge Rally in Khammam : జిల్లా సరిహద్దు కూసుమంచి మండలం నాయకన్గూడెం వద్ద ఘన స్వాగతం పలికారు. ఉమ్మడి ఖమ్మం జిల్లా నలుమూలల నుంచి పెద్ద ఎత్తున తరలివచ్చిన కార్యకర్తలు, అనుచరులు.. తుమ్మలకు ఘనస్వాగతం పలికారు. నాయకన్ గూడెం నుంచి దాదాపు 30 కిలోమీటర్ల పాటు వేలాది కార్లు, ద్విచక్ర వాహనాలతో ర్యాలీ నిర్వహించారు. ర్యాలీ ప్రారంభం నుంచి ఖమ్మం గొల్లగూడెంలోని తన నివాసం వరకు ఓపెన్ టాప్ వాహనంలో ప్రదర్శనగా వచ్చిన ప్రజలకు అభివాదం చేస్తూ ముందుకు కదిలారు. నాయకన్ గూడెం నుంచి ఖమ్మం వరకు దాదాపు 6 గంటల పాటు భారీ ర్యాలీ కొనసాగింది. ర్యాలీలో ఎక్కడా బీఆర్ఎస్, కేసీఆర్ ఫొటోలు లేకుండానే ర్యాలీ సాగింది. కొన్నిచోట్ల కార్యకర్తలు తుమ్మల జెండాలతో పాటు కాంగ్రెస్ జెండాలు పట్టుకోవడంతో కార్యకర్తలు చర్చించుకున్నారు.
Thummala Comments on Assembly Elections 2023 : నా ప్రజల కోసం.. వచ్చే ఎన్నికల్లో పోటీ చేస్తా: తుమ్మల
ప్రజల కోసం పోటికి వస్తా: భారీగా తరలివచ్చిన అభిమానులు, కార్యకర్తలను ఉద్దేశించి తుమ్మల మాట్లాడుతూ.. రాజకీయాలు అవసరం లేదని తాను అనుకున్నానని కానీ.. ప్రజల కోసం కచ్చితంగా రాజకీయాల్లో ఉంటానని ప్రకటించారు. వచ్చే ఎన్నికల్లో కచ్చితంగా పోటీ చేసి తీరుతానని.. ఈ విషయంలో తగ్గేదే లే అని ప్రకటించారు. తాను రాజకీయంగా ఎన్నోసార్లు కిందపడ్డా.. జిల్లా ప్రజలు మళ్లీ నిలబెట్టారని గుర్తుచేసుకున్న తుమ్మల.. మళ్లీ జిల్లా ప్రజలు, కార్యకర్తల గౌరవం, ప్రతిష్ట, ఆత్మగౌరవం పెంచేందుకు వచ్చే ఎన్నికల్లో పోటీ చేస్తానన్నారు. ఎక్కడా తలవంచే ప్రసక్తే లేదని తెలిపారు.
"నాకు ఎన్నికలు అవసరం లేదు. కానీ గోదావరి జలాలతో జిల్లా ప్రజల పాదాలు కడిగి రాజకీయాలకు స్వస్తి పలుకుతానని ముఖ్యమంత్రికి చెప్పాను. నేను ఇప్పుడు మీకు మాట ఇస్తున్నాను. గోదావరి నీళ్లతో మీ కాళ్లు కడిగే వరకు శానససభ నుంచి జరగను. నా రాజకీయ లక్ష్యాన్ని నెరవేర్చుకోకుండా ఉండటానికి కొంతమంది ఎత్తుగడలు వేస్తున్నారు. ఈసారి ఎన్నికల్లో తప్పకుండా మీకోసం నిలబడతాను." - తుమ్మల నాగేశ్వరరావు, మాజీ మంత్రి
ఇక ఎన్నికల్లో పోటీ చేస్తానన్న తుమ్మల ప్రకటన ఇప్పుడు రాజకీయ వర్గాల్లో చర్చనీయాంశంగా మారింది. తుమ్మల రాజకీయ పయనంపై సర్వత్రా ఉత్కంఠ రేపుతోంది. ఇప్పటికే బీఆర్ఎస్ ఉమ్మడి ఖమ్మం జిల్లాలోని అన్ని స్థానాలకు అభ్యర్థులను ప్రకటించింది. ఈ నేపథ్యంలో తుమ్మల పోటీ చేస్తానని ప్రకటించడం ప్రాధాన్యం సంతరించుకుంది. లక్షలాది మంది కార్యకర్తలు, అభిమానుల కోరిక మేరకు తుమ్మల ఎన్నికల్లో బరిలో నిలవడం ఖాయమని.. ఆయన తనయుడు తుమ్మల యుగంధర్ ప్రకటించారు.
వారం, పది రోజుల్లో రాజకీయంగా నిర్ణయం తీసుకునే అవకాశం ఉందని తుమ్మల యుగంధర్ వెల్లడించారు. బీఆర్ఎస్ నుంచి పోటీ చేసే అవకాశం తుమ్మలకు లేకపోవడంతో తుమ్మల రాజకీయ పయనం ఎటువైపు ఉంటుందన్న చర్చ ఊపందుకుంది. తుమ్మల పార్టీ మారుతారా.. ఒకవేళ పార్టీ మారితే ఏ పార్టీలోకి వెళ్తారు. లేకపోతే స్వతంత్రంగానే బరిలో నిలుస్తారా అన్న అంశాలపై ఉభయ జిల్లా రాజకీయ వర్గాల్లో రకరకాలుగా చర్చలు జరుగుతున్నాయి.
thummala BRS MLA Ticket Issue : కారు దిగుతారా.. కాంగ్రెస్కు వెళ్తారా.. తుమ్మల దారి ఎటువైపు..?
కృష్ణయ్య హత్య దారుణం, ఎలాంటి చర్యలకు దిగొద్దని తుమ్మల కార్యకర్తలకు సూచన
