Fire Gun: ఏదో పని మీద మీరు అడవిలోకి వెళ్లారనుకోండి.. లేదా మీరు చేసే పని అటవీ ప్రాంత సమీపంలోనే ఉందనుకోండి. ప్రతిరోజు కృూరమృగాలతో సావాసం. ప్రాణాలమీద భయంతో అనుక్షణం గజగజ వణకాల్సిందే. ఏ సమయంలో ఏం జరుగుతుందోనని భయపడాల్సిందే. సడెన్గా మీకు ఓ జంతువు ఎదురుపడితే.. దాణ్నుంచి ఎలా తప్పించుకుంటారు. సాధారణ జంతువైతే కాస్త ఫైట్ చేయొచ్చేమో గానీ.. కృూర జంతువు అయితే మాత్రం మీ సంగతి అంతే. ఇలాంటి పరిస్థితులు ఎదురైనప్పుడు జంతువుల నుంచి మన ప్రాణాలు కాపాడుకోవడానికి జగిత్యాల జిల్లా మెట్పల్లికి చెందిన ప్రభాకర్ అనే వ్యక్తి ఓ ఫైర్గన్ను తయారు చేశాడు.
ఫైర్గన్..
Fire Gun to Threaten Animals: జగిత్యాల జిల్లా మెట్పల్లి పట్టణంలోని బీడీ కాలనీకి చెందిన ప్రయోగాల ప్రభాకర్ చదివింది పదో తరగతే అయినా.. తన మెదడుకు పదును పెడుతూ కొత్తకొత్త ఆవిష్కరణలు చేస్తుంటారు. గత 30 ఏళ్ల నుంచి వివిధ రకాల ఆవిష్కరణలు చేసి స్థానికుల ప్రశంసలు పొందుతున్నారు. తాజాగా అటవీ ప్రాంతంలో వన్యప్రాణుల నుంచి రక్షించుకోవడానికి ప్రత్యేకంగా ఓ ఫైర్గన్ తయారు చేశారు.
ఆ గన్ చూస్తే చాలు భయంతో పరుగులు..
Fire Gun For Tribal People: ఎల్పీజీ గ్యాస్ సిలిండర్తో పాటు వివిధ పరికరాలను ఏర్పాటు చేసి సుమారు 15 రోజుల పాటు కష్టపడి ఈ ఫైర్గన్ను రూపొందించారు. దీనికి 5 కిలోల ఎల్పీజీ గ్యాస్తోపాటు పొడగాటి పైపులు బిగించి దానికి స్టిగ్గర్ లాంటి చేతిపిడిని ఏర్పాటు చేశారు. దాని పక్కనే ఆన్.. ఆఫ్ బటన్ను బిగించారు. పైపు పైభాగాన పెద్ద లైటర్ను ఏర్పాటు చేశారు. గ్యాస్ బటన్ ఆన్ చేసి.. లైటర్ను నొక్కితే చాలు అందులో నుంచి నిప్పు వస్తోంది. వెంటనే స్టిగ్గర్ నొక్కితే నిప్పు ఎక్కువవుతుంది. ఈ నిప్పు చూసి జంతువులు భయంతో పరుగులు పెట్టే విధంగా ఈ యంత్రాన్ని రూపొందించారు ప్రభాకర్.
సర్కార్ సాయం చేస్తే..
'ఈ గన్ను తయారు చేయడానికి రూ.5వేలు ఖర్చయింది. దీనికి ఎల్పీజీ గ్యాస్, పైపులు, స్టిగ్గర్ వంటివి అవసరమయ్యాయి. ఇది అటవీ ప్రాంతంలో ఉండే గిరిజనులు.. అటవీ శాఖ అధికారులకు ఉపయోగకరంగా ఉంటుంది. ప్రభుత్వం సహకరిస్తే ఇలాంటివి మరిన్ని తయారు చేస్తాను.'
- ప్రయోగాల ప్రభాకర్, ఫైర్గన్ ఆవిష్కర్త
వారి కోసమే ఈ ఫైర్గన్..
Fire Gun for Forest Officers: అడవినే ఆధారంగా చేసుకుని బతికే గిరిజనులు నిత్యం జంతువుల బారిన పడి ప్రాణాలు కోల్పోతుంటారు. అడవుల్లోనే విధులు నిర్వర్తించే అధికారులకూ ఈ ముప్పు ఉంటుంది. ఈ ఇరువురికి ఈ పరికరం ఎంతో మేలు చేస్తుందని ప్రభాకర్ తెలిపారు. వర్షంలో కూడా ఈ గన్ పనిచేసే విధంగా ప్రత్యేకంగా రూపొందించానని చెప్పారు. ఈ పరికరాన్ని అటవీ అధికారులకు డెమో చూపించి.. ప్రభుత్వం సహకరిస్తే.. మరిన్ని ఫైర్గన్లను తయారు చేసి అందిస్తానని అంటున్నారు.