కారుణ్య మరణాలకు అనుమతివ్వండి : విద్యార్థులు

కారుణ్య మరణాలకు తమకు అనుమతి ఇవ్వాలంటూ పశు సంవర్ధక పాలిటెక్నిక్​ విద్యార్థులు రాష్ట్ర మానవ హక్కుల కమిషన్​ను ఆశ్రయించారు. అర్హులమైన తమను కాదని వెటర్నరీ అసిస్టెంట్​ పోస్టులను అటెండర్లతో భర్తీ చేస్తూ తమ జీవితాలతో చెలగాటం ఆడుతున్నారని కమిషన్​కు వివరించారు. న్యాయస్థానం నుంచి తీర్పు వచ్చేంత వరకు ఎటువంటి భర్తీలు చేపట్టకుండా ఆదేశాలు ఇవ్వాలని వారు కమిషన్​ను విజ్ఞప్తి చేశారు.

పట్టభద్రులమైన తాము ఉద్యోగాలు లేక రోడ్డునపడ్డామని... కుటుంబాలను పోషించలేని స్థితిలో ఉన్న తమకు కారుణ్య మరణాలకు అనుమతి ఇవ్వాలంటూ పశు సంవర్ధక పాలిటెక్నిక్ స్టూడెంట్స్ అసోసియేషన్ నాయకులు రాష్ట్ర మానవ హక్కుల కమిషన్​ను ఆశ్రయించారు. పశుసంవర్ధక శాఖలో వెటర్నరీ అసిస్టెంట్ పోస్టులకు అర్హులమైన తమను కాదని... అటెండర్​లతో ఆ పోస్టులను భర్తీ చేస్తూ తమ జీవితాలతో అధికారులు చెలగాటం ఆడుతున్నారని అసోసియేషన్ అధ్యక్షుడు సమరసింహరెడ్డి కమిషన్​కు వివరించారు. టెక్నికల్ పోస్టులను అటెండర్లతో భర్తీ చేస్తున్నారని... పశుసంవర్ధక శాఖ డైరెక్టర్ స్వలాభం కోసం ఈ విధంగా వ్యవహరిస్తున్నారని ఆరోపించారు.

జీవో నెంబర్​ 26ను అక్రమంగా తీసుకొచ్చి... 50 శాతం ఉద్యోగాలను అటెండర్లకు కట్టబెడుతున్నారని తెలిపారు. పోస్టులను అమ్ముకొనేందుకే డైరెక్టర్ ఈ జీవోను తీసుకొచ్చారని ఆరోపించారు. ఈ విషయంపై న్యాయస్థానాన్ని ఆశ్రయించామని... తీర్పు రాకముందే పోస్టులను అటెండర్లతో భర్తీ చేసేందుకు డైరెక్టర్ ప్రయత్నిస్తున్నారని అన్నారు. ఈ నెల 18న అటెండర్లకు ట్రైనింగ్ ఇచ్చేందుకు ఏర్పాట్లు చేస్తున్నారని వివరించారు. డైరెక్టర్ ఏకపక్షంగా తీసుకున్న నిర్ణయాన్ని ఉపసంహరించుకొని... న్యాయస్థానం నుంచి తీర్పు వచ్చేంత వరకు ఎటువంటి భర్తీలు చేపట్టకుండా ఆదేశాలు ఇవ్వాలని వారు కమిషన్​ను విజ్ఞప్తి చేశారు. లేనిపక్షంలో రాష్ట్రవ్యాప్తంగా ఉన్న పశు సంవర్ధక పాలిటెక్నిక్ విద్యార్థులందరికి సామూహిక ఆత్మహత్యలకు అనుమతి ఇవ్వాలని వారు హెచ్​ఆర్​​సీని కోరారు.

ఇదీ చదవండి: అపోహలతో పౌల్ట్రీ పరిశ్రమకు తీవ్ర నష్టం: తలసాని