BRS meeting in Maharashtra: మహారాష్ట్రలోని ఛత్రపతి శంభాజీ నగర్‌ (ఔరంగాబాద్)లో ఈనెల 24వ తేదీన భారీ బహిరంగ సభను నిర్వహించాలని బీఆర్ఎస్ పార్టీ నిర్ణయించింది. భద్రతా కారణాల దృష్ట్యా ఔరంగాబాద్‌లోని అంఖాస్ మైదానంలో బహిరంగ సభ జరపడం వీలుకాదని పోలీసులు స్పష్టం చేశారు. సభకు అనుమతి నిరాకరిస్తున్నట్లు తెలిపారు. నగరంలోని మిలింద్ కాలేజీకి దగ్గరలో ఈ సమావేశాన్ని ఏర్పాటు చేసుకోమని సూచించగా.. అందుకు సీఎం కేసీఆర్ నిరాకరించినట్లు తెలుస్తోంది.
BRS Public meeting in Maharashtra : మహారాష్ట్రలో బీఆర్ఎస్ సభకు పోలీసులు అనుమతి నిరాకరించడంతో గులాబీ నేతలకు పెద్ద ఎదురు దెబ్బ తగిలిందనే చెప్పుకోవచ్చు. మహారాష్ట్రలో తమ పార్టీ బలంగా ఉందని.. ఎక్కువ మంది రాజకీయ నేతలు బీఆర్‌ఎస్‌లో చేరడానికి ఆసక్తి చూపుతున్నారని సీఎం కేసీఆర్ అన్నారు. తమ ప్రభుత్వ విధివిధానాలు, పథకాలు నచ్చి చాలా మంది పార్టీలోకి రావడానికి ఇష్టపడుతన్నారని పలు సందర్బాల్లో వ్యాఖ్యానించారు. అంతే కాకుండా నెల రోజులు క్రితమే.. ఈనెల 18 లేదా 24వ తేదీల్లో అక్కడ బహిరంగ సభ పెట్టడానికి పక్కా ప్రణాళికలు రచించారు.
Maharashtra Police denies permission to BRS Meeting : ఈ నేపథ్యంలోనే ఈనెల 24న ఔరంగాబాద్లో భారీ బహిరంగ సభను నిర్వహించాలని నిర్ణయించినట్లు ప్రకటించారు. ఆ సభకు సంబంధించిన పోస్టర్లను కూడా విడుదల చేశారు. అందుకు తగినట్టుగా భారీ జన సమీకరణపై ఫోకస్ చేశారు. ఈ సమావేశంలోనే స్థానిక నాయకుల చేరికలు కూడా జరపాలని అనుకున్నారు. అంతా అనుకున్నట్లే జరుగుతుండగా.. అకస్మాత్తుగా ఇవాళ మహారాష్ట్ర పోలీసులు బీఆర్ఎస్కు షాక్ ఇచ్చారు. సభకు అనుమతి నిరాకరిస్తున్నట్లు చెప్పడంతో బీఆర్ఎస్ శ్రేణులు గందరగోళానికి గురయ్యారు.
మరట్వాడా నుంచి వేల మంది కార్మికులు ఈ సమావేశానికి తరలిరానున్న నేపథ్యంలో పోలీసులు అనుమతివ్వకపోయినా సభను అదే రోజు నిర్వహించాలని బీఆర్ఎస్ నిర్ణయించింది. అందుకోసం వేరే ప్రాంతాన్ని ఎంపిక చేసే పనిలో పడింది. పెద్ద ఎత్తున కార్యకర్తలు, అభిమానులు, ప్రజలు ఈ సభకు తరలిరానున్నందున.. ఔరంగాబాద్లోనే బిడ్ బైపాస్ రోడ్డు దగ్గరలో ఉన్న జంబిడా మైదానంలో సభను నిర్వహించేందుకు రంగం సిద్ధం చేస్తోంది. భారీ సంఖ్యలో ప్రజలు తరలిరానున్నందున.. దానికి అంఖాస్ మైదానం సరిపోదని, పార్కింగ్‌ స్థలం కూడా తగినంత లేదని అందువల్ల సభాస్థలిని జంబిడా మైదానానికి మార్చినట్లు బీఆర్ఎస్ వర్గాలు ఓ ప్రకటనలో తెలిపాయి. కార్యకర్తలు, కేసీఆర్ అభిమానులు సభకు భారీ సంఖ్యలో ఈ బహిరంగ సభకు తరలి రావాలని కోరాయి.
ఇవీ చదవండి:
ఆత్మీయ సమ్మేళనాలను 2 నెలల్లోపు పూర్తి చేయండి: కేటీఆర్‌
'విశాఖ స్టీల్‌ప్లాంట్‌పై కేంద్రం నిర్ణయం ఏపీలో బీఆర్ఎస్కు తొలి విజయం'
