Protests at Pragathi Bhavan: బదిలీల్లో దంపతులకు ఒకేచోట పోస్టింగ్ ఇవ్వాలని డిమాండ్ చేస్తూ ఉపాధ్యాయులు ప్రగతిభవన్ ఎదుట నిరసన చేపట్టారు. జీవో 317 కింద చేపట్టిన బదిలీల్లో భార్యాభర్తలను పరిగణనలోకి తీసుకుని ఒకేచోట పోస్టింగ్ ఇవ్వాలని డిమాండ్ చేస్తూ ప్రగతి భవన్ ముట్టడికి యత్నించారు. అప్రమత్తమైన పోలీసులు అడ్డుకుని వారిని అదుపులోకి తీసుకున్నారు. ఆందోళన చేస్తున్న 50 మంది టీచర్లను అరెస్టు చేశారు.
దూరం పంపించొద్దు
'మేమంతా అంతర్ జిల్లా బాధితులం. 317 జీవో వల్ల భార్యాభర్తలను వేరే వేరే జిల్లాలకు బదిలీలు చేశారు. ఈ జీవో కారణంగా వేర్వేరు జిల్లాలకు బదిలీలు ఇవ్వడంతో మానసిక క్షోభకు గురవుతున్నాం. 19 జిల్లాల ఉపాధ్యాయ దంపతులను ఒకే చోట వేశారు. మా 13 జిల్లాలను బ్లాక్ లిస్టులో పెట్టారు. మేము ఇక్కడికి గొడవ చేయాలని రాలేదు. మాకు న్యాయం చేయాలని వేడుకుంటున్నాం.'-బాధిత ఉపాధ్యాయ దంపతులు
రాష్ట్రంలోని 19 జిల్లాలకు చెందిన ఉపాధ్యాయ భార్యాభర్తలకు ఒకేచోట పోస్టింగ్ ఇచ్చారని.. మిగతా 13జిల్లాలకు చెందిన తమకు వేర్వేరుచోట్ల కేటాయించారని ఉపాధ్యాయులు ఆవేదన వ్యక్తం చేశారు. వేర్వేరు జిల్లాలకు కేటాయించడంతో 150- 200 కి.మీల దూరంలో దంపతులను విభజించారని వాపోయారు. ముఖ్యమంత్రి సత్వరమే నిర్ణయం తీసుకోవాలని 13జిల్లాలకు చెందిన ఉపాధ్యాయ ఉద్యోగులు విజ్ఞప్తి చేశారు.
ఇదీ చదవండి: జీహెచ్ఎంసీ జోనల్ కార్యాలయంలో అగ్నిప్రమాదం.. పలు దస్త్రాలు దగ్ధం
