Bathukamma celebrations in Telangana: తెలంగాణ రాష్ట్ర పండుగ 'బతుకమ్మ' ఉత్సవాల ప్రారంభం సందర్భంగా రాష్ట్ర ప్రజలకు ముఖ్యమంత్రి కేసీఆర్ శుభాకాంక్షలు తెలిపారు. ఆడబిడ్డలు తీరొక్క పూలతో బతుకమ్మను పేర్చి ఆడుతూ పాడుతూ ఆనందోత్సాహాల నడుమ జరిగే వేడుకలు పల్లెల్లో ప్రత్యేకతను చాటుతాయన్నారు. బతుకమ్మ పండుగను జరుపుకొనేందుకు రాష్ట్ర ప్రభుత్వం అన్ని ఏర్పాట్లు చేసిందని సీఎం తెలిపారు. బతుకమ్మ ప్రారంభం సందర్భంగా రాష్ట్ర ప్రజలు, ఆడపడుచులకు మహిళా, శిశుసంక్షేమ శాఖ మంత్రి సత్యవతి రాఠోడ్‌ శుభాకాంక్షలు తెలిపారు.
మహబూబ్‌నగర్‌: పీసీసీ అధ్యక్షుడు రేవంత్ రెడ్డి తెలంగాణ ఆడబిడ్డలకు బతుకమ్మ పండుగ శుభాకాంక్షలు తెలిపారు. మహబూబ్‌నగర్‌ జిల్లా జడ్చర్లలో అట్టహాసంగా బతుకమ్మ వేడుకలు నిర్వహించారు. ఈ ఉత్సవాల్లో విద్యాశాఖమంత్రి సబితా ఇంద్రారెడ్డి పాల్గొన్నారు. మహిళలతో కలిసి జడ్చర్ల ఎమ్మెల్యే లక్షారెడ్డి మహిళలతో కలిసి దాండియా నృత్యం చేశారు.
ఆదిలాబాద్: జిల్లాలో సఖి కేంద్రంలో ముందస్తు బతుకమ్మ వేడుకలు కోలాహలంగా సాగాయి. కలెక్టర్ సిక్తా పట్నాయక్ అంగన్వాడీ కార్యకర్తలు, కళాశాల విద్యార్థులతో కలిసి బతుకమ్మ ఆడారు. సిద్దిపేట జిల్లా హుస్నాబాద్‌లో బొడ్డెమ్మ వేడుకలను మహిళలు సందడిగా జరుపుకున్నారు. తీరొక్క పూలతో బతుకమ్మను పేర్చిన మహిళలు ఆటాపాటలతో సందడి చేశారు. పాఠశాలలకు దసరా సెలవులు సందర్భంగా ఖమ్మం జిల్లా వైరాలో చివరి రోజు విద్యార్థులు బతుకమ్మ సంబరాలు జరుపుకున్నారు.
యాదాద్రి భువనగిరి: విద్యార్థినులు కోలాట నృత్యాలతో ఆకట్టుకున్నారు. ఏన్కూరు మండలంలో కస్తూరిబా పాఠశాలలో బాలికలు కేరింతలు కొడుతూ సంబరాలు చేశారు. సూర్యాపేట జిల్లా హుజూర్‌నగర్‌లో నిర్వహించిన బతుకమ్మ వేడుకల్లో స్థానిక ఎమ్మెల్యే శానంపూడి సైదిరెడ్డి పాల్గొన్నారు. మహిళలతో కలిసి ఎమ్మెల్యే కోలాటం ఆడుతూ సందడి చేశారు. యాదాద్రి జిల్లా భువనగిరి కలెక్టరేట్‌లో బతుకమ్మ వేడుకలు కోలాహలంగా జరిగాయి. మహిళ ఉద్యోగులతో కలిసి కలెక్టర్ పమేలా సత్పతి బతుకమ్మ ఆడారు.
నిజామాబాద్‌: జిల్లాలోని పాత కలెక్టరేట్ మైదానంలో ఘనంగా బతుకమ్మ వేడుకలు నిర్వహించారు. మహిళా శిశు సంక్షేమ శాఖ ఏర్పాటు చేసిన పోషణ బొడ్డెమ్మ ప్రత్యేకంగా ఆకట్టుకుంది. వరంగల్ జిల్లా రాయపర్తి మండలం మైలారంలో బతుకమ్మ వేడుకలు సందడిగా సాగాయి. మహిళలతో కలిసి ఎస్సై బండారి రాజు కోలాటం ఆడారు. మరోవైపు బతుకమ్మ చీరల పంపిణీ శరవేగంగా సాగుతోంది. కొన్ని నియోజకవర్గాల్లో ఇప్పటికే పూర్తికాగా మరికొన్ని ప్రాంతాల్లో ఆడపడుచులకు ప్రజాప్రతినిధులు ప్రభుత్వ కానుకలు అందిస్తున్నారు.
ఇవీ చదవండి:
