ఒలింపిక్స్ చరిత్రలోనే తొలిసారి సెమీఫైనల్లో అడుగుపెట్టింది భారత హాకీ మహిళల జట్టు. విశ్వక్రీడల క్వార్టర్స్లో ఆస్ట్రేలియాతో జరిగిన మ్యాచ్లో 1-0 తేడాతో భారత అమ్మాయిలు గెలిచారు. ఈ టీమ్లో ఝార్ఖండ్కు చెందిన సలీమా టేట్.. అనే పేదింటి అమ్మాయి కూడా ఉంది. ఆమె తల్లిదండ్రులు బడ్కిచాపర, సిమ్డేగాతో పాటు సోదరి మహిమ పొలం పని చేసుకుంటూ బతుకునీడుస్తున్నారు. వీరింట్లో కనీసం టీవీ కూడా లేదు. ఆ గ్రామంలో ఇంటర్నెట్ కూడా సరిగా లేదు. దీంతో సలీమా ఆటను చూసేందుకు ఎంతగానో శ్రమించారు ఆ గ్రామస్థులు.
ఏం జరిగిందంటే?
ఝార్ఖండ్ జిల్లాలోని బడ్కిచాపరలో గ్రామంలో వారం నుంచి ఎడతెరిపిలేని వర్షాలు కురుస్తున్న కారణంగా కొన్ని రోజులుగా కరెంట్ సరఫరా లేదు. ఆ గ్రామంలో సుమారు 45 కుటుంబాలున్నా.. ఒక్క టీవీ కూడా లేకపోవడం గమనార్హం. అలాగే మొబైల్ ఇంటర్నెట్ వాడేందుకూ సదుపాయమూ లేదు. అలాంటి పరిస్థితుల నడుమ జీవిస్తున్న ఆ గ్రామస్థులు.. తమ అమ్మాయి ఆట చూసేందుకు చాలా కష్టపడ్డారు. క్వార్టర్స్లో ఆస్ట్రేలియాతో తలపడనున్న మ్యాచ్ను చూసేందుకు ప్రత్యేక వనరులను ఏర్పాటు చేసుకున్నారు. ఓ జనరేటర్ ఏర్పాటు చేసి.. అక్కడున్న ప్రజలంతా కలిసి ఆ మ్యాచ్ను తిలకించారు. ఆస్ట్రేలియాపై భారత జట్టు గెలవడం చూసి వారెంతో మురిసిపోయారు.
ఆ మ్యాచ్లో భారత మహిళల జట్టు ఒలింపిక్స్లో సెమీస్కు చేరడంపై ఆమె కుటుంబసభ్యులు సంతోషాన్ని వ్యక్తం చేశారు. సలీమా టేట్ పట్ల తామెంతో గర్వంగా ఉన్నట్లు ఆమె తల్లిదండ్రులతో పాటు సోదరి మహిమ వెల్లడించారు.
"మా అమ్మాయి పట్ల మేమెంతో ఆనందంగా, గర్వంగా ఉన్నాం. ఒలింపిక్స్ సెమీఫైనల్లోనూ నెగ్గి.. వారంతా(భారత హాకీ మహిళల జట్టు) బంగారు పతకంతో స్వదేశానికి తిరిగి వస్తారని ఆశిస్తున్నాం. మా గ్రామస్థులంతా ఎంతో ఆనందంగా ఉన్నారు. హాకీ మ్యాచ్లను మేమంతా కలిసి చూస్తున్నాం" అని సలీమా టేట్ కుటుంబసభ్యులు వెల్లడించారు.
ఇదీ చూడండి.. పేదరికం వెనక్కి లాగితే.. పట్టుదల ఒలింపిక్స్‌కు చేర్చింది!
