ఒలింపిక్స్ ముగిసిన రెండ్రోజుల తర్వాత (ఆగస్టు 10న) విశ్వక్రీడలకు సంబంధించి ఓ ఫుట్బాల్ మ్యాచ్ను ప్రసారం చేసింది ఉత్తర కొరియా టీవీ ఛానెల్. ఈ విషయాన్ని ఆ దేశ స్థానిక మీడియా నివేదికలు వెల్లడించాయి. జులై 21న యూకే, చిలీ మధ్య జరిగిన మహిళల ఫుట్బాల్ మ్యాచ్ను 70 నిమిషాల పాటు కొరియన్ సెంట్రల్ టెలివిజన్ (కేసీటీవీ) ప్రసారం చేసింది. ఈ వీడియో ఎలా వచ్చిందనేది ఇప్పటికీ స్పష్టత లేదు. అయితే, ఆ వీడియో క్వాలిటీతో పాటు కామెంట్రీ కూడా సరిగా లేదని నివేదికలు పేర్కొన్నాయి. దీంతో పాటు చైనా, బ్రెజిల్ మధ్య జరిగిన మ్యాచ్ కూడా ప్రసారమైనట్లు తెలుస్తోంది. కానీ, ఇందుకు సంబంధించి ఆధారాలేమి లేవు.
ఉత్తర కొరియాలో ఇలాంటి పొరపాట్లు జరగడం కొత్తేమీ కాదు. గతంలో కూడా ఒలింపిక్స్, ఇతర ఆటలకు సంబంధించి మ్యాచ్లు చాలా ఆలస్యంగా ప్రసారమయ్యేవి. నిర్ణీత సమయానికి కాకుండా వారాలు, సంవత్సరాలు ఆలస్యమైన సందర్భాలున్నాయి. 2016 రియో ఒలింపిక్స్ ప్రారంభమైన నాలుగు రోజుల తర్వాత ఆ దేశంలో మ్యాచ్ల ప్రత్యక్ష ప్రసారం జరిగింది.
కరోనా నేపథ్యంలో ఈ సారి ఉత్తర కొరియా నుంచి ఏ ఒక్క అథ్లెట్ను ఒలింపిక్స్కు పంపలేదు. కొవిడ్ నుంచి ప్రజలను కాపాడలనే ఉద్దేశ్యంతోనే ఈ నిర్ణయం తీసుకున్నట్లు ఆ దేశ క్రీడాశాఖ ప్రకటించింది. 33 ఏళ్ల తర్వాత ఉత్తర కొరియా విశ్వక్రీడల నుంచి తప్పుకోవడం ఇదే మొదటిసారి. అంతకుముందు 1988 ఒలింపిక్స్లోనూ ఆ దేశం పాల్గొనలేదు. ఒలింపిక్స్లో ఇప్పటివరకు 16 స్వర్ణాలతో సహా మొత్తంగా 57 పతకాలు తన ఖాతాలో వేసుకుంది ఉత్తర కొరియా.
ఇదీ చదవండి: Olympics 2021: ఆ ప్లేయర్కు మరో గోల్డ్ మెడల్.. అదే కారణం
