టోక్యో ఒలింపిక్స్లో స్వర్ణ పతకం సాధించిన జావెలిన్ త్రో క్రీడాకారుడు నీరజ్ చోప్డా తీవ్ర అస్వస్థతకు గురయ్యాడు. అతడికి బాగా జ్వరం వచ్చింది. దీంతో అతడిని ఆస్పత్రికి తరలించారు. అయితే అతడి ఆరోగ్యం బాగానే ఉన్నట్లు స్నేహితులు, కుటుంబసభ్యులు తెలిపారు.
ఒలింపిక్స్ తర్వాత తొలిసారి మంగళవారం దిల్లీ నుంచి హరియాణా పానిపట్ సమీపంలోని తన స్వగ్రామమైన సమల్ఖాకు భారీ ఉరేగింపుతో బయల్దేరాడు నీరజ్. వివిధ ప్రాంతాల నుంచి పెద్ద ఎత్తున ప్రజలు తరలి వచ్చారు. అతడిపై పూల వర్షం కురిపించారు. దారిపొడవునా కారు టాప్పై ఉండి అందరికీ అభివాదం చేస్తూనే ఉన్నాడు నీరజ్. దీంతో దాదాపు ఆరు గంటలపాటు సాగిన ఈ యాత్రలో నీరసించిపోవడం వల్ల అనారోగ్యానికి గురయ్యాడు. ఊరేగింపు చివరి వరకు కూడా ఉండలేకు మార్గ మధ్యలోనే తప్పుకొన్నాడు. దీంతో అతడిని ఆస్పత్రికి తీసుకెళ్లారు.
ఒలింపిక్స్ తర్వాత వరుస సన్మాన కార్యక్రమాలతో తీరిక లేకుండా గడుపుతున్నాడు నీరజ్. ఈ క్రమంలోనే కొద్ది రోజుల క్రితం అతడికి జ్వరం సోకింది. టెస్టులు చేయించుకోగా కొవిడ్ నెగిటివ్ వచ్చింది. అనారోగ్యం వల్ల ఇటీవల హరియాణా గవర్నర్ బండారు దత్తాత్రేయ ఏర్పాటు చేసిన సన్మాన కార్యక్రమానికి అతడు గైర్హాజరయ్యాడు. అయితే ఆ తర్వాత దిల్లీలోని ఎర్రకోటలో నిర్వహించిన స్వాతంత్య్ర వేడుకల్లో పాల్గొన్నాడు. అనంతరం మంగళవారం అక్కడి నుంచి భారీ ఊరేగింపుతో స్వగ్రామానికి బయల్దేరగా మార్గమధ్యలో అతడికి జ్వరం సోకింది.
ఇదీ చూడండి: వినేశ్కు మద్దతుగా నిలిచిన నీరజ్ చోప్డా
