మహిళల ప్రీమియర్ లీగ్లో భాగంగా దిల్లీ క్యాపిటల్స్ జట్టు వరుస విజయాలతో దూసుకుపోతోంది. సోమవారం.. రాయల్ ఛాలెంజర్స్ బెంగళూరు జట్టుతో జరిగిన లీగ్ మ్యాచ్లో ఆరు వికెట్ల తేడాతో దిల్లీ విజయం సాధించింది. ఇన్నింగ్స్లో ఇంకో రెండు బంతులు ఉండగానే లక్ష్యాన్ని చేరుకుంది. ఇప్పటికే వరుస ఓటములతో కొట్టుమిట్టాడుతున్న ఆర్సీబీకి మళ్లీ నిరాశే ఎదురైంది.
ఆర్సీబీ నిర్దేశించిన 151 పరుగుల మోస్తరు లక్ష్యంతో దిల్లీ బరిలోకి దిగింది. గత మ్యాచ్లో అదరగొట్టిన ఓపెనర్ షెఫాలీ వర్మ ఈ మ్యాచ్లో నిరాశపరిచింది. డకౌట్గా వెనుదిరిగింది. తర్వాత క్రీజులోకి వచ్చిన కాప్సే దూకుడుగా ఆడింది. కానీ ప్రీతి బోస్ బౌలింగ్.. పెర్రీకి క్యాచ్ ఇచ్చి ఔట్గా వెనుదిరిగింది. ఆ తర్వాత మరో ఓపెనర్ మెగ్ లానింగ్ కూడా 15 పరుగులు చేసి పెవిలియన్ చేరింది. అనంతరం మైదానంలోకి వచ్చిన జెమీమా రోడ్రిగ్స్ స్కోరు బోర్డు స్పీడ్ పెంచేందుకు ప్రయత్నించింది. కానీ ఆశా శోభన బౌలింగ్లో 32 పరుగులు చేసి ఔటయ్యింది. ఆ తర్వాత క్రీజులోకి వచ్చిన బ్యాటర్లు మరిజేన్ కాప్(32), జొనాసెన్(29) ధాటిగా ఆడారు. జట్టును విజయతీరాలకు చేర్చారు.
తొలుత టాస్‌ ఓడి బ్యాటింగ్‌ చేసిన ఆర్సీబీ.. నిర్ణీత 20 ఓవర్లలో నాలుగు వికెట్ల నష్టానికి 150 పరుగులు చేసింది. ఎల్లీస్‌ పెర్రీ (67; 52 బంతుల్లో 4 ఫోర్లు, 5 సిక్స్‌లు) అర్ధ శతకంతో మెరసింది. మరో బ్యాటర్ రిచా ఘోష్‌ (37; 16 బంతుల్లో 3 ఫోర్లు, 3 సిక్స్‌లు) దూకుడుగా ఆడింది. కెప్టెన్‌ స్మృతి మంధాన (8), హెథర్‌ నైట్‌ (11) నిరాశపరిచారు. సోఫీ డివైన్‌ (21) ఫర్వాలేదనిపించింది. శ్రేయంకా పాటిల్‌ (4*) పరుగులు చేసింది. దిల్లీ బౌలర్లలో శిఖా పాండే మూడు వికెట్లతో ఆకట్టుకోగా.. తారా నోరిస్ ఒక వికెట్‌ను ఖాతాలో వేసుకుంది.
మహిళల ప్రీమియర్ లీగ్లో భాగంగా మంగళవారం.. ముంబయి ఇండియన్స్, గుజరాత్ జెయింట్స్ జట్లు తలపడనున్నాయి. ఇప్పటికి ఆడిన నాలుగు మ్యాచుల్లో విజయం సాధించిన ముంబయి జట్టు.. పాయింట్ల పట్టికలో మొదటి స్థానంలో నిలిచింది. గుజరాత్ జట్టు మాత్రం ఆడిన నాలుగు మ్యాచుల్లో ఒక్కటే గెలిచి నాలుగో స్థానంలో ఉంది. మరి ముంబయి వరుస విజయ యాత్రకు గుజరాత్ బ్రేక్ వేస్తుందో లేదో చూడాలి.
