West Indies Tour Of India: దేశంలో కొవిడ్ కేసుల సంఖ్య గణనీయంగా పెరగటం వల్ల ఇప్పటికే రంజీ ట్రోఫీ, సీకే నాయుడు ట్రోఫీతోపాటు సీనియర్ ఉమెన్స్ టీ 20లీగ్ను వాయిదా వేసింది బీసీసీఐ. అయితే తాజాగా భారత్-వెస్టిండీస్ సిరీస్పైనా కీలక నిర్ణయం తీసుకోనున్నట్లు తెలుస్తోంది. విండీస్తో జరిగే మ్యాచ్లను ఒకటి లేదా రెండు వేదికల్లోనే నిర్వహించాలని బోర్డు ఆలోచిస్తున్నట్లు సమాచారం. అయితే దీనిపై ఇంకా అధికారిక ప్రకటన మాత్రం రాలేదు.
" ప్రస్తుతం పరిస్థితులు అనుకూలంగా లేవు. ఫిబ్రవరిలో కేసులు ఉచ్ఛదశకు చేరుకునే అవకాశం ఉంది. ఆరు వేదికల్లో మ్యాచ్లను నిర్వహించడం పీడకలే" అని ఓ బీసీసీఐ అధికారి మీడియాకు తెలిపారు.
వెస్టిండీస్ జట్టు ఫిబ్రవరి మొదటివారంలో భారత్లో పర్యటించనుంది. ఈ పర్యటనలో భాగంగా ఇరు జట్ల మధ్య మూడు వన్డేలు, మూడు టీ20లు జరగనున్నాయి.
అహ్మదాబాద్, జైపుర్, కోల్కతాలో మూడు వన్డేలు జరగనుండగా.. కటక్, విశాఖపట్నం, తిరువనంతపురంలో మూడు టీ20లు జరగనున్నాయి. అయితే ఈ మ్యాచ్లకు స్టేడియంలోకి ప్రేక్షకులను అనుమతించరని సమాచారం.
టీమ్ఇండియా ప్రస్తుతం దక్షిణాఫ్రికా పర్యటనలో ఉంది. జనవరి 23న ఈ పర్యటన ముగుస్తుంది. ఫిబ్రవరి 6 నుంచి వెస్టిండీస్తో సిరీస్ ప్రారంభం కానుంది.
ఇదీ చూడండి: SA vs IND: 'కోహ్లీ కోలుకున్నాడు.. మూడో టెస్టుకు రెడీ'
