IPL 2023 Chennai Super Kings : ధోనీ సారధ్యంలోని చెన్నై సూపర్ కింగ్స్ ఈ ఐపీఎల్ లీగ్ దశలో అదరగొట్టింది. గత సీజన్లో పేలవ ప్రదర్శనతో 9వ స్థానంలో నిలిచిన చెన్నై.. ఈసారి అద్భుతంగా పుంజుకుందంటే కారణం ధోనీనే. మహీ తనదైన వ్యూహాలతో జట్టును విజయబాటలో నడిపిస్తున్నాడు. ఏ మాత్రం అనుభవం లేని యువ బౌలర్లను ప్రోత్సహిస్తూ మంచి ఫలితాలు రాబట్టుతున్నాడు. లీగ్ దశలో రెండో స్థానంలో నిలిచిన చెన్నై.. క్వాలిఫయర్-1 లో డిఫెండింగ్‌ చాంఫియన్‌ గుజరాత్‌ను ఓడించి ఫైనల్‌లోకి దూసుకెళ్లింది. టైటిల్‌కు అడుగు దూరంలో నిలిచిన ఆ చెన్నై.. ఫైనల్లో విజయం సాధించి ఐదో టైటిల్ నెగ్గాలని తహతహలాడుతుంది. ఇక ధోనీకి ఇదే చివరి ఐపీఎల్ అంటూ ఊహాగానాల్లో ఉన్న చెన్నై అభిమానులు.. కప్ గెలిచి ధోనీకి గిఫ్ట్ ఇవ్వాలని కోరుకుంటున్నారు.
ఓపెనింగ్ బ్యాటర్లు రుతురాజ్‌ గైక్వాడ్‌, డేవన్‌ కాన్వే చెన్నైకి అతిపెద్ద బలం. సీజన్ మొదటి నుంచే వీరిద్దరూ నిలకడగా రాణిస్తున్నారు. మిడిల్ ఆర్డర్లో శివమ్ ధూబే, రవీంద్ర జడేజా, రహానేలు అవసరమైనప్పుడల్లా జట్టును ఆదుకుంటున్నారు. ఇక చివర్లో ఫినిషింగ్కి ధోని ఉండనే ఉన్నాడు. బౌలింగ్లో తుషార్‌ దేశ్‌పాండే, పతిరణ రాటు దేలారు. ఇక దీపక్‌ చాహర్‌, తీక్షణ, జడేజా కీలక సమయాల్లో వికెట్లు తీస్తు జట్టుకు అండగా నిలుస్తున్నారు. ఇక ఫైనల్ మ్యాచ్లోనూ జట్టు సభ్యులందరూ సమష్టి కృషితో రాణిస్తే చెన్నై విజయాన్ని ఎవరూ ఆపలేరు.
IPL 2023 Gujarat Titans : గత సీజన్లోనే ఐపీఎల్లో ఎంట్రీ ఇచ్చిన గుజరాత్ టైటాన్స్.. అరంగేట్ర సీజన్ నుంచి ఇప్పటి వరకూ అన్ని విభాగాల్లో రాణిస్తూ సంచలన విజయాలు నమోదు చేస్తోంది. బ్యాటింగ్లో ముఖ్యంగా గిల్ సునాయాసంగా శతకాలు బాదేస్తూ, రికార్డులను చెరిపేస్తున్నాడు. ఆదివారం జరిగే ఫైనల్ మ్యాచ్లోనూ గిల్ తన ఫామ్ను కొనసాగిస్తే.. గుజరాత్ భారీ స్కోరు సాధించడం ఖాయమని అంతా భావిస్తున్నారు.
క్వాలిఫయర్-2 లో సాయి సుదర్శన్‌ టచ్లోకి రావటం గుజరాత్కు కలిసొచ్చేదే. ఈ సీజన్లో కెప్టెన్ హర్దిక్ పాండ్య నుంచి చెప్పకోదగ్గ ఇన్నింగ్స్ రాలేదు. ఫైనల్లో పాండ్య చెలరేగాలని ఫ్యాన్స్ ఆశిస్తున్నారు. షమీ (28 వికెట్లు), రషీద్‌ ఖాన్‌ (27 వికెట్లు), మోహిత్‌ శర్మ(24)లతో గుజరాత్ బౌలింగ్ విభాగం చెన్నై కంటే మెరుగ్గా ఉందనే చెప్పాలి. గుజరాత్ ఆల్రౌండ్ ప్రదర్శనతో మెరిస్తే.. ఆ జట్టు వరుసగా రెండోసారి టైటిల్ను ముద్దాడుతుంది.
ఇరు జట్లను ఊరిస్తున్న రికార్డులు.. ఈ ఫైనల్లో చెన్నై సూపర్ కింగ్స్ గెలిస్తే.. ఐపీఎల్ చరిత్రలో ఐదో టైటిల్ సాధించిన జట్టుగా ముంబయి ఇండియన్స్ సరసన నిలుస్తుంది. మరోవైపు గుజరాత్ విజయం సాధిస్తే.. అరంగేట్ర సీజన్ నుంచి వరుసగా రెండోసారి ఛాంపియన్గా నిలిచి రికార్డులకెక్కుంది. మరి చెన్నై పాంచ్ పటాకానా... గుజరాత్ డబుల్ ధమాకానా అనేది ఆదివారం అర్థ్రరాత్రి వరకు వేచి చూడాలి.
IPL 2023 Prize Money : ఈ సీజన్లో ఛాంపియన్గా నిలిచే జట్టు రూ.20 కోట్లు ప్రైజ్‌మనీని దక్కించుకుంటుంది. రన్నరప్‌గా నిలిచే టీమ్‌కు రూ. 13 కోట్లు ఇవ్వనున్నారు. అదే విధంగా మూడో స్థానంలో నిలిచిన ముంబయికి రూ. 7 కోట్లు, నాలుగో స్థానంలో నిలిచిన లఖ్‌నవూకు రూ.6.5 కోట్లు ఇవ్వనున్నారు.
అత్యధిక పరుగులు చేసిన బ్యాటర్కు, అత్యధిక వికెట్లు తీసిన బౌలర్కు రూ.15 లక్షల ప్రైజ్మనీ అందుకుంటారు. ఇక ఇవే కాకుండా సూపర్ స్ట్రైకర్ ఆఫ్‌ ది సీజన్‌గా నిలిచిన ఆటగాడు రూ.15 లక్షలు దక్కించుకుంటారు. అత్యంత విలువైన ఆటగాడిగా నిలిచిన ప్లేయర్, గేమ్‌ ఛేంజర్‌ ఆఫ్‌ ది సీజన్‌గా నిలిచిన ఆటగాళ్లు చెరో రూ.12 లక్షలు దక్కించుకుంటారు.
