Mohammed Shami Unique Record: ఐపీఎల్-2022లో అద్భుతంగా రాణించిన గుజరాత్ టైటాన్స్ జట్టు అరంగేట్రంలోనే కప్పు కొల్లగొట్టింది. సమష్టిగా రాణించి విజయంలో కీలకపాత్ర పోషించారు ఆ జట్టు ఆటగాళ్లు. బ్యాటింగ్లో కెప్టెన్ హార్దిక్ పాండ్య, మిల్లర్, శుభ్మన్ గిల్ వెన్నెముకగా నిలిస్తే.. బౌలింగ్లో మహ్మద్ షమి, రషీద్ ఖాన్, యశ్ దయాల్ అదరగొట్టారు. షమి ముఖ్యంగా పవర్ప్లేలో పొదుపుగా బౌలింగ్ చేస్తూ.. మొత్తంగా 20 వికెట్లు పడగొట్టాడు. ఈ క్రమంలోనే 15 ఏళ్ల ఐపీఎల్ చరిత్రలో ఎవరికీ సాధ్యం కాని ఘనతను సొంతం చేసుకున్నాడు.
ఇండియన్ ప్రీమియర్ లీగ్లో మొత్తం అన్ని మ్యాచ్లు ఆడి.. ఒక్కసారి కూడా బ్యాటింగ్కు రాలేదు షమి. టోర్నీలో ఇప్పటివరకు ఇలా జరగలేదు. దీంతో.. అరుదైన రికార్డును తన పేరిట రాసుకున్నాడు గుజరాత్ బౌలర్. ఈ సీజన్లో గుజరాత్ టైటాన్స్ చాలా వరకు మ్యాచ్లు ఆఖరి ఓవర్లో గెలిచింది. బ్యాటింగ్లో నిలకడతో టెయిలెండర్లకు పెద్దగా బ్యాటింగ్ చేసే అవకాశమే రాలేదు. ఈ క్రమంలోనే షమీకి ఈ ఘనత సాధ్యమైంది.
షమీని ఐపీఎల్ మెగా వేలంలో రూ. 6.25 కోట్లకు దక్కించుకుంది టైటాన్స్. తన మీద యాజమాన్యం పెట్టుకున్న నమ్మకాన్ని వమ్ముచేయకుండా.. 16 మ్యాచ్ల్లో 20 వికెట్లతో ఆ జట్టు తరఫున టాప్ బౌలర్గా నిలిచాడు. ఎకానమీ కూడా 8 లోపే ఉండటం విశేషం. అంతేకాకుండా ఈ ఐపీఎల్ తాను వేసిన మొదటి బంతికి, ఆఖరి బంతికి వికెట్ తీయడం గమనార్హం. తొలి మ్యాచ్లో లఖ్నవూ సూపర్ జెయింట్స్ కెప్టెన్ కేఎల్ రాహుల్ను ఈ టోర్నీలో తాను వేసిన మొదటి బంతికే పెవిలియన్ చేర్చాడు. ఫైనల్లో ఇన్నింగ్స్ ఆఖరి బంతికి రియాన్ పరాగ్ను బౌల్డ్ చేశాడు షమి.
ఇవీ చూడండి: బీసీసీఐ పెద్ద మనసు.. క్యురేటర్స్, గ్రౌండ్స్మెన్కు ప్రైజ్మనీ
రోహిత్, కోహ్లీ లేకుండా.. సచిన్ ఐపీఎల్ 2022 సీజన్ బెస్ట్ టీమ్!
