Delhi capitals Covid positive: ఐపీఎల్ 15వ సీజన్లో కరోనా మహమ్మారి కలకలం సృష్టిస్తోంది. ఇప్పటికే పలువురు దిల్లీ క్యాపిటల్స్ జట్టు ఆటగాళ్లు వైరస్ బారినపడగా.. తాజాగా ఆ జట్టు హెడ్కోచ్ రికీ పాంటింగ్ కుటుంబ సభ్యుల్లో ఒకరికి పాజిటివ్గా తేలింది. దీంతో పాంటింగ్ ఐసోలేషన్కు వెళ్లాడు. రాజస్థాన్ రాయల్స్ జట్టుతో శుక్రవారం జరిగే మ్యాచ్కు దూరం కానున్నాడు పాంటింగ్.
ఆర్ఆర్తో మ్యాచ్ నేపథ్యంలో గురువారం ఏప్రిల్ 21న, శుక్రవారం ఏప్రిల్ 22న దిల్లీ క్యాపిటల్స్ ఆటగాళ్లు, సిబ్బంది, వారి కుటుంబ సభ్యులకు కరోనా పరీక్షలు నిర్వహించారు. ఈ పరీక్షల్లో రికీ పాంటింగ్కు రెండుసార్లు నెగిటివ్గా తేలింది. అయితే.. అతడి కుటుంబ సభ్యుల్లో ఒకరికి పాజిటివ్గా తేలటం వల్ల ఐదురోజుల క్వారంటైన్కు వెళ్లాల్సి వచ్చింది. కొవిడ్ వ్యాప్తిని అడ్డుకునేందుకు ముందు జాగ్రత్త చర్యగా పేర్కొంది డీసీ. పాంటింగ్ కుటుంబం మొత్తాన్ని ఐసోలేషన్కు తరలించారు.
"దిల్లీ క్యాపిటల్స్ హెడ్కోచ్ రికీ పాంటింగ్ కుటుంబ సభ్యుల్లో ఒకరికి కొవిడ్ పాజిటివ్గా తేలింది. కుటుంబం మొత్తాన్ని ఐసోలేషన్కు తరలించారు. పాంటింగ్కు నిర్వహించిన రెండు టెస్టుల్లో నెగిటివ్ వచ్చింది. జట్టును దృష్టిలో ఉంచుకుని యాజమాన్యం, మెడికల్ టీమ్.. పాంటింగ్ను ఐదురోజుల ఐసోలేషన్కు తరలించాలని నిర్ణయించింది. రాజస్థాన్ రాయల్స్తో జరిగే ఇవాళ్టి మ్యాచ్కు పాంటింగ్ దూరంకానున్నాడు. ప్రస్తుత పరిస్థితుల్లో పాంటింగ్ కుటుంబానికి అండగా నిలవాలి. ఇప్పటి వరకు బయోబబుల్లో ఉండి పాజిటివ్గా తేలినవారిని నిశితంగా పరిశీలిస్తున్నాం. ప్రతిఒక్కరు త్వరగా కోలుకునేందుకు జట్టు కృషి చేస్తోంది."
- దిల్లీ క్యాపిటల్స్ ప్రకటన.
కరోనా కలవరంతో ఇప్పటికే దిల్లీ క్యాపిటల్స్, రాజస్థాన్ రాయల్స్ మధ్య మ్యాచ్ వేదికను పుణెలోని ఎంసీఏ మైదానం నుంచి ముంబయిలోని వాంఖెడే స్టేడియానికి మార్చింది బీసీసీఐ. మిచెల్ మార్ష్, టిమ్ సేఫెర్ట్ వంటి విదేశీ ఆటగాళ్లు సహా మొత్తంగా ఆరుగురికి కరోనా పాజిటివ్గా తేలిన క్రమంలో దిల్లీ క్యాపిటల్స్ జట్టులోని వారికి ప్రతిరోజు పరీక్షలు నిర్వహిస్తున్నారు.
ఇదీ చూడండి: ఇర్ఫాన్ పఠాన్- అమిత్ మిశ్రా ట్విట్టర్ వార్.. కారణమేంటి?
