IPL 2022 CSK Vs KKR: వాంఖడే వేదికగా సాగుతున్న ఐపీఎల్ 15వ సీజన్ తొలి మ్యాచ్లో కోల్కతా బౌలర్లు కట్టుదిట్టంగా బంతులేశారు. దీంతో చెన్నై జట్టు నిర్ణీత 20 ఓవర్లలో 5 వికెట్లు కోల్పోయి 131 పరుగులు చేసింది. కోల్కతా జట్టుకు 132 పరుగుల లక్ష్యాన్ని నిర్దేశించింది. చెన్నై బ్యాటర్లలో మాజీ సారథి ధోనీ(50) టాప్ స్కోరర్‌గా నిలిచాడు.
టాస్ ఓడి బ్యాటింగ్‌కు దిగిన చెన్నై జట్టుకు ఆరంభంలోనే కోల్కతా షాక్‌ ఇచ్చింది. ఉమేశ్ యాదవ్ వేసిన తొలి ఓవర్లోనే సీఎస్కే ఓపెనర్‌ రుతురాజ్‌ గైక్వాడ్‌ (0) అవుటయ్యాడు. ఉమేశ్ యాదవ్ వేసిన ఇన్నింగ్స్ ఐదో ఓవర్లో మరో ఓపెనర్‌ డెవాన్ కాన్వే (3).. శ్రేయస్ అయ్యర్‌కు చిక్కి పెవిలియన్‌ చేరాడు. రాబిన్ ఉతప్ప (28) నిలకడగా ఆడాడు. వరుణ్ చక్రవర్తి వేసిన చక్కటి బంతికి స్టంపౌటయ్యాడు. అనంతరం ఆ ఓవర్లోనే అంబటి రాయుడు కూడా రనౌటై.. క్రీజు వీడాడు. ఆండ్రీ రసెల్ వేసిన బంతికి శివమ్‌ దూబె (3).. సునీల్ నరైన్‌కు చిక్కాడు. దీంతో సగం ఓవర్లకే చెన్నై సగం వికెట్లు కోల్పోయినట్లయింది. కెప్టెన్ రవీంద్ర జడేజా(26), ధోనీ(50) నాటౌట్గా నిలిచారు. ఆఖర్లో ధోనీ సిక్స్లు, ఫోర్లతో మెరిపించాడు. కోల్కతా బౌలర్లలో ఉమేశ్ యాదవ్ రెండు వికెట్లు తీయగా, రుసెల్, వరుణ్ చక్రవర్తి తలో వికెట్ పడగొట్టారు.
'టోక్యో ఒలింపిక్స్' పతక విజేతలకు సత్కారం..
గతేడాది జరిగిన టోక్యో ఒలింపిక్స్ విజేతలకు ఐపీఎల్ ఆరంభ మ్యాచ్కు ముందు బీసీసీఐ సత్కరించింది. ఒలింపియన్లు జావెలిన్ త్రో గోల్డ్ మెడలిస్ట్ నీరజ్ చోప్రాకు రూ.కోటి చెక్ అందించగా.. బాక్సర్ లవ్లీనాను రూ.25 లక్షల చెక్తో బీసీసీఐ సన్మానించింది. 41 ఏళ్ల తర్వాత ఒలింపిక్స్ పతకం నెగ్గినందుకు భారత పురుషుల హాకీ జట్టు తరఫున కెప్టెన్ మన్ప్రీత్ కౌర్కు చెక్ అందించింది. టోక్యో ఒలింపిక్స్‌లో భారత ఒలింపిక్ బృందం రికార్డు స్థాయిలో ఈసారి 7 పతకాలు సాధించింది.
ఇదీ చదవండి: Women World Cup 2022: మిథాలీ సేన సెమీస్‌కు చేరుతుందా?
