అబుదాబి వేదికగా బుధవారం జరిగిన మ్యాచ్లో ఆల్రౌండ్ ప్రదర్శనతో అదరగొట్టింది ముంబయి ఇండియన్స్. బెంగళూరు జట్టుపై ఐదు వికెట్ల తేడాతో ఘన విజయం సాధించింది. అయితే.. ఐపీఎల్లో ఎప్పుడు ఏం జరుగుతుందో అంచనా వేయలేం అంటున్నాడు బెంగళూరు జట్టు కెప్టెన్ విరాట్ కోహ్లి. తమ బౌలర్లు చక్కని ప్రదర్శన చేశారని అన్నాడు. కానీ.. చివరి 5 ఓవర్లలో ముంబయి తమను కట్టడి చేసిందని చెప్పాడు.
"మా జట్టుకు చివరి 5 ఓవర్లు చాలా క్లిష్టమైనవి. అంతా ఫీల్డర్ల అధీనంలోకి వెళ్లిపోయింది. ముంబయి జట్టు చక్కగా బౌలింగ్ చేసి చివరి 5 ఓవర్లలో 20 పరుగులకే మమ్మల్ని కట్టిడి చేశారు. మా బౌలర్లు చక్కగా రాణించారు. ముంబయి జట్టు బ్యాట్స్మెన్ బాగా ఆడారు. ప్రారంభంలో కొన్ని జట్లు అదరగొడతాయి. మరికొన్ని జట్లు తర్వాత బాగా ఆడుతాయి. ఐపీఎల్లో ఏ జట్టు అద్భుతంగా రాణిస్తుందో, ఏది వెనుకబడిపోతుందో అంచనా వేయలేం."
--- విరాట్ కోహ్లీ, రాయల్ ఛాలెంజర్స్ బెంగళూరు కెప్టెన్.
'ఫినిషింగ్ చేస్తా'
74 పరుగులతో సూర్యకుమార్ యాదవ్ ముంబయి విజయంలో కీలక పాత్ర పోషించాడు. 'మ్యాన్ ఆఫ్ ది మ్యాచ్'గా నిలిచాడు. తనకు ఫినిషింగ్ చేయడం అంటేనే ఇష్టం అంటున్నాడు సూర్యకుమార్. లాక్డౌన్ కాలంలో తన ఆటతీరుపై అవగాహనకు వచ్చినట్లు చెప్పాడు.
"నేను ఆటను ఫినిషింగ్ చేయాలని అనుకుంటున్నాను. ధ్యానం చేయడం నాకు చాలా సాయపడింది. లాక్డౌన్ కాలంలో నా ఆటతీరును తెలుసుకున్నాను. తగినట్టుగా మెరుగుపరుచుకున్నాను. ఈ మ్యాచును ముగించడం సంతోషంగా ఉంది."
-- సూర్యకుమార్ యాదవ్. ముంబయి జట్టు ఆటగాడు. (మ్యాన్ ఆఫ్ ది మ్యాచ్)
'సూర్య అండగా నిలిచాడు'
రోహిత్ గాయంతో ఆటకు దూరమవగా.. ముంబయి జట్టు సారథ్య బాధ్యతను మరోసారి కీరన్ పొలార్డ్ చేపట్టాడు. తమ విజయంపై ఆనందాన్ని పంచుకున్నాడు.
"బుమ్రా ఒక్కడిపైనే ఆధారపడకుండా.. సమష్టి కృషి చేయాలనుకుంటున్నాం. మేము కొన్ని వికెట్లు కోల్పోయాము. కానీ, సూర్య కుమార్ మాకు అండగా నిలిచాడు. ఆ స్థానంలో మరొకరు వస్తే ఎలా ఉండేదో ఊహించండి. అతను చేయాల్సినదాన్ని అద్భుతంగా కొనసాగించాడు."
-- కీరన్ పొలార్డ్, ముంబయి ఇండియన్స్.
మొదట టాస్‌ ఓడి బ్యాటింగ్‌కు దిగిన బెంగళూరు నిర్ణీత 20 ఓవర్లలో ఆరు వికెట్లు కోల్పోయి 164 పరుగులు చేసింది. తర్వాత బరిలోకి దిగిన ముంబయి.. 19.1ఓవర్లలోనే ఐదు వికెట్లు కోల్పోయి లక్ష్యాన్ని ఛేదించింది.
ఇదీ చూడండి:'సూర్య' ప్రతాపం.. ప్లేఆఫ్స్కు చేరిన ముంబయి
