కరోనా లాక్డౌన్ సడలింపులతో క్రీడా కార్యక్రమాలన్నీ తిరిగి ప్రారంభమవుతున్నాయి. భారత్లో మాత్రం టోర్నీలు, మ్యాచ్లు నిర్వహించేందుకు ప్రభుత్వం అనుమతించలేదు. భౌతిక దూరం, వైరస్ నియంత్రణ జాగ్రత్తలు పాటిస్తూ.. ఆటగాళ్ల శిక్షణా శిబిరాలు నిర్వహించుకోవచ్చని కేంద్రం తెలిపింది.
ఈ క్రమంలో ఇంట్లోనే ఉంటూ తమ ఫిట్నెస్ కోసం కసరత్తు చేస్తున్నారు టీమ్ఇండియా క్రికెటర్లు. ఇందులో భాగంగానే ఇంట్లో జిమ్, ఆరుబయట రన్నింగ్ చేస్తున్నట్లు చెప్పాడు పేసర్ భువనేశ్వర్ కుమార్. ట్విట్టర్లో #ఆస్క్భువీ కార్యక్రమంలో భాగంగా అభిమానులతో ముచ్చటించాడు. వారు అడిగిన కొన్ని ప్రశ్నలకు సమాధానమిచ్చాడు.
అన్ని ఫార్మాట్లలో మీరు తీసిన వాటిలో ఎప్పటికీ గుర్తుండిపోయే వికెట్లు?
భువనేశ్వర్ : మూడు ఫార్మాట్లలో నేను సాధించిన తొలి వికెట్. (నవ్వుతూ)
తొలి ఓవర్ బౌలింగ్ మీకు లేదా బుమ్రాకు ఇవ్వాలని ఎలా నిర్ణయిస్తారు?
భువనేశ్వర్ : అది కెప్టెన్ నిర్ణయం.
డెత్ ఓవర్లలో బౌలింగ్ చేయడానికి వెళ్లినప్పుడు మీరు భయపడే బ్యాట్స్మన్ ఎవరు?
భువనేశ్వర్ : ఏ బ్యాట్స్మన్ అంటే భయం లేదు కానీ, అందరిపై గౌరవం ఉంది.
లాక్డౌన్ ముగిసిన తర్వాత మీరు వెళ్లే మొదటి ప్రదేశం ఏది?
భువనేశ్వర్ : ప్రాక్టీసు కోసం క్రికెట్ గ్రౌండ్కు వెళతాను.
ప్రస్తుత పరిస్థితుల్లో ఫిట్గా ఉండటానికి మీరు ఏం చేస్తారు? మీకు నచ్చే కసరత్తులేమిటి?
భువనేశ్వర్ : బాల్కానీలో జిమ్, ఇంటి వెనుకున్న ఖాళీ ప్రదేశంలో రన్నింగ్ చేస్తున్నా. వెయిట్ లిఫ్టింగ్ను ఎక్కువగా ఇష్టపడతాను.
ఐపీఎల్లో మీకు బాగా గుర్తుండిపోయే జ్ఞాపకం?
భువనేశ్వర్ : 2016లో ఐపీఎల్ టైటిల్ నెగ్గడం.
హైదరాబాద్ గురించి ఓ మంచి విషయం?
భువనేశ్వర్ : నాకు చాలా ఇష్టమైన ప్రదేశం. ఒక్క దాన్ని ఎంచుకోవడం కష్టం.
లాక్డౌన్లో మీరు నేర్చుకున్న కొత్త విషయం?
భువనేశ్వర్ : కొన్ని ఇంటి పనులను నేర్చుకున్నా.
క్రికెట్ కాకుండా మీకు నచ్చే క్రీడ?
భువనేశ్వర్ : ఫుట్బాల్, బ్యాడ్మింటన్
క్రికెట్లో బంతికి లాలాజల నిషేధం అమలులో ఉండటం వల్ల బౌలింగ్ కష్టమవుతుందని మీరు అనుకుంటున్నారా? ముఖ్యంగా రెడ్బాల్ క్రికెట్లో? ఇంగ్లాండ్, న్యూజిలాండ్ వంటి చల్లటి వాతావరణం గల దేశాల్లో చెమట లేకుండా బౌలింగ్ ఎలా చేయగలరు?
భువనేశ్వర్ : ప్రపంచంలోని ప్రతిచోటా చెమట పట్టడం సాధ్యం కాదు. బౌలర్లకు ఇది కచ్చితంగా సవాలుగా ఉంటుంది. త్వరలోనే వీటన్నిటికి మార్గం దొరుకుందని ఆశిస్తున్నా.
ఒకవేళ మీకు అల్లాదీన్ దీపం దొరికితే మీరు కోరుకునే మూడు ఏంటి?
భువనేశ్వర్ :
1) ప్రపంచాన్ని కరోనా నుంచి విముక్తి చేయాలని.
2) అత్యవసర పరిస్థితి కోసం ఓ కోరికను నా దగ్గరే ఉంచుకుంటా.
3) అందులో ఉన్న జీనీకి శాశ్వత స్వేచ్ఛను కలిగిస్తాను.
