టీమ్ఇండియా మాజీ కెప్టెన్ మహేంద్ర సింగ్ ధోనీపై పాకిస్థాన్ క్రికెట్ సంఘం ప్రశంసలు కురిపించింది. భారత జట్టుకు దిశానిర్దేశం చేసిన గొప్ప సారథుల్లో ధోనీ ఒకరని కితాబిచ్చారు పాక్ ఆటగాళ్లు. తనదైన శైలిలో ఆటను ప్రభావితం చేసిన వ్యక్తిగా అభివర్ణించారు. ఆగస్టు 15న.. మహేంద్రుడు అంతర్జాతీయ క్రికెట్కు వీడ్కోలు పలికాడు.
ఈ సందర్భంగా పాకిస్థాన్ స్టార్ క్రికెటర్లు ఇంజమామ్-ఉల్-హక్, బసిత్ ఆలీ, వసీమ్ అక్రమ్, వకార్ యూనిస్, ముదస్సార్ నాజర్, షాహిద్ అఫ్రిది తదితరులు ధోనీపై తమకున్న అపారమైన గౌరవాన్ని ఎలుగెత్తి చాటారు.
![pakistan cricket fraternity salutes dhoni for impactful career](https://etvbharatimages.akamaized.net/etvbharat/prod-images/dhoni_1708newsroom_1597683619_103.jpg)
"భారత్ నుంచి వచ్చిన గొప్ప కెప్టెన్లలో ధోనీ ఒకడు. అతను ఎప్పటికీ నా మనస్సులో ఉంటాడు. మాహీకి వ్యతిరేకంగా ఆడేటప్పుడు మ్యాచ్ను ఆస్వాదిస్తా. అతను నిజమైన మ్యాచ్ విన్నర్. మహీ భారత్లోనే కాదు, ప్రపంచంలోనే గొప్ప ఆటగాడు. క్రికెట్ చరిత్రలో ఎవరికీ సాధ్యం కాని విధంగా ఒక్కడే మూడు ఐసీసీ ట్రోఫీలు సాధించాడు."
ఇంజమామ్, పాక్ క్రికెటర్
భారత క్రికెట్లో ధోనీ శకం ఎప్పటికీ గుర్తుండిపోతుందని రషీద్ లతీఫ్ అభిప్రాయపడ్డాడు. "అద్భుతమైన ఆటగాడు, కెప్టెన్. ఆటను క్షుణ్నంగా పరిశీలించి.. పరిస్థితులకు అనుగుణంగా ఆటగాళ్లను ఉపయోగించడంలో మంచి నైపుణ్యం కలిగిన వ్యక్తి ధోనీ. మ్యాచ్ ముగింపులో నంబర్-1. గతేడాది ప్రపంచకప్ సెమీ ఫైనల్లో న్యాయం చేయలేదని అతనిపై ఎన్నో విమర్శలొచ్చాయి. కానీ, క్లిష్ట సమయాల్లో అతను ఎంతో శ్రమించాడు." అని లతీఫ్ తెలిపాడు.
![pakistan cricket fraternity salutes dhoni for impactful career](https://etvbharatimages.akamaized.net/etvbharat/prod-images/ms-dhoni-2_1708newsroom_1597657902_274.jpg)
మాజీ టెస్టు ఓపెనర్, ముదస్సార్ నాజర్ మాట్లాడుతూ.. "నేను కెన్యాలో కోచింగ్లో ఉన్నప్పుడు మొదటిసారి ధోనీని చూశా. నైరోబీలో జరిగిన త్రైపాక్షిక సిరీస్లో ధోనీ వరుస సెంచరీలతో విరుచుకుపడ్డాడు. కానీ, ప్రపంచ క్రికెట్పై ఇంత ప్రభావాన్ని చూపిస్తాడని నేను కలలో కూడా ఊహించలేదు" అని పేర్కొన్నాడు.
కెప్టెన్, వికెట్ కీపర్ స్థానాల్లో ఉంటూ.. భారీ పరుగులు సాధించగల ధోనీ సామర్థ్యం ఆశ్చర్యకరమని పాకిస్థాన్ బ్యాట్స్మన్ మహమ్మద్ యూసఫ్ అన్నాడు. ఇక తన కెరీర్ మొత్తంలో ధోనీ లాంటి మల్టీ టాలెంటెండ్ ఆటగాడిని ఎప్పుడూ చూడలేదని బసిత్ ఆలీ అభిప్రాయపడ్డాడు.
![pakistan cricket fraternity salutes dhoni for impactful career](https://etvbharatimages.akamaized.net/etvbharat/prod-images/8450384_ms-dhoni-s.jpg)
ఇంకా ఎవరెవరు ఏమన్నారంటే..
రాబోయే యువ ఆటగాళ్లకు ధోనీ స్ఫూర్తి: మోహ్సిన్ ఖాన్
ధోనీ అన్ని విధాలుగా గౌరవాన్ని పొందేందుకు అర్హమైన వ్యక్తి: మొయిన్ ఖాన్
నిజమైన ఆటగాడికి, కెప్టెన్కు ప్రతిరూపం మహీ: అఫ్రిది
క్రికెట్ ప్రపంచంలో ధోనీ మార్క్ ఎప్పటికీ గుర్తుండిపోతుంది: బాబర్ అజామ్
ధోనీ.. ఐసీసీ ప్రపంచకప్, టీ20 ప్రపంచ కప్, ఛాంపియన్స్ ట్రోఫీ టైటిళ్లను గెలిచిన సారథిగా ఘనత సాధించాడు. ఇప్పటివరకు ఈ మూడు టైటిళ్ల ఫీట్ను ఏ దేశ కెప్టెన్ అందుకోలోదు. మహీ సారథ్యంలోనే టెస్టు క్రికెట్లో భారత్ నంబర్.1 స్థానం అందుకుంది.