ఐపీఎల్కు ఇంకా 25 రోజులు మాత్రమే ఉంది. ఇప్పటికే లీగ్ జరుగబోతున్న యూఏఈకి జట్లన్నీ చేరుకున్నాయి. హోటళ్లలో బస కూడా ఏర్పాటైంది. సాధారణంగా ఆటగాళ్ల వసతి గురించి ఎవరికీ పెద్దగా ఆసక్తి ఉండదు. కానీ ఈసారి లీగ్ పూర్తిగా యూఏఈలోనే నిర్వహించనున్నారు. రెండు నెలలకు పైగా ఆటగాళ్లు ఆ దేశంలోనే ఉండనున్నారు.
కరోనా ముప్పు నేపథ్యంలో వారంతా బయో'బుడగ'కు పరిమితం కానున్నారు. మరి సుదీర్ఘ సమయం హోటళ్లకు పరిమితం కానున్న వారికి.. ఎలాంటి వసతి ఏర్పాటు చేశారు.? ఏ జట్టు ఆటగాళ్లు ఎక్కడ ఉండబోతున్నారు..? వంటి విశేషాలను తెలుసుకుందాం రండి.
ముంబయి ఇండియన్స్
రోహిత్ శర్మ నేతృత్వంలోని డిఫెండింగ్ ఛాంపియన్స్ ముంబయి ఇండియన్స్ జట్టు.. అబుదాబిలోని 'సెయింట్ రేజిస్ సాదియత్' ఐలాండ్ రిసార్ట్లో బస చేస్తోంది. ఈ హోటల్కు అనుసంధానంగా బీచ్కుడా ఉంది. దుబాయ్లోని అతిపెద్ద రిసార్ట్ల్లో ఇదీ ఒకటి. ముంబయి జట్టు స్పాన్సర్లలో ఒకటైన మారియట్ గ్రూప్కు చెందినదే ఈ రిసార్ట్ కావడం విశేషం.
కోల్కతా నైట్రైడర్స్
కోల్కతా నైట్రైడర్స్ జట్టుకు దుబాయ్లోని 'ది రిట్జ్ కార్టన్' హోటల్లో వసతి కల్పించారు. 'గ్రాండ్ కెనాల్' అని కూడా పిలిచే ఈ హోటల్ను 57 ఏకరాల విస్తీర్ణంలో నిర్మించారు. భారీ ఉద్యానవనం, ఈతకొలను, ప్రైవేటు బీచ్ ఉన్న రిసార్ట్ ఇది. నైట్రైడర్స్ యజమాని షారుఖ్ ఖాన్కు ఈ హోటల్తో అనుబంధం ఉంది. రిసార్ట్లో సగం గదులను జట్టు కోసం బుక్ చేసినట్లు సమాచారం.
రాయల్ ఛాలెంజర్స్ బెంగళూరు
విరాట్ కోహ్లీ జట్టు రాయల్ ఛాలెంజర్స్ బెంగళూరు.. పామ్ జుమేరా ప్రాంతంలోని వాల్డర్ఫ్ అస్టోరియా హోటల్లో బస చేస్తోంది. దుబాయ్లో అత్యంత ఖరీదైన హోటల్లో ఇదొకటి. ఇందులోని గదుల నుంచి సముద్రం కనిపిస్తుంది. ప్రైవేటు బీచ్ అందుబాటులో ఉన్న ఈ రిసార్ట్లో ఆరు భారీ రెస్టారెంట్లు, లాంజ్లు ఉన్నాయి.
చెన్నై సూపర్కింగ్స్
దుబాయ్కి తలమానికమైన బుర్జ్ ఖలీఫాకు పక్కనే ఉన్న తాజ్ దుబాయ్ హోటల్లో మహేంద్ర సింగ్ ధోనీ సైన్యం.. మూడు సార్లు ఐపీఎల్ ట్రోఫీ సొంతం చేసుకున్న సీఎస్కే బస చేస్తోంది. తమ ఆటగాళ్లు, సిబ్బంది కోసం ఫ్రాంచైజీ యాజమాన్యం ఈ హోటల్లో ఒక ఫ్లోర్ మొత్తం బుక్ చేసుకుంది.
సన్రైజర్స్ హైదరాబాద్
ఐపీఎల్ మాజీ ఛాంపియన్ సన్రైజర్స్ హైదరాబాద్ దుబాయ్లో సముద్రాన్ని ఆనుకుని ఉన్న 'రిట్జ్ కార్ల్టన్' హోటల్లో ఉంటోంది. ఇందులో గదులన్నీ సముద్ర అందాలు కనిపించేలా ఉంటాయి. సన్రైజర్స్ ఆటగాళ్ల కోసం ప్రత్యేకంగా ఓ క్లబ్ లాంజ్ను కేటాయించినట్లు సమాచారం.
కింగ్స్ ఎలెవెన్ పంజాబ్
ఈ జట్టుకు దుబాయ్లోని 'సోఫిటెల్ ది పామ్' హోటల్లో బస ఏర్పాటు చేశారు. విలాసవంతమైన హోటళ్లకు పెట్టిది పేరైన పామ్ జుమేరా ప్రాంతంలో బెంగళూరు జట్టు ఉంటున్న వాల్డర్ఫ్ అస్టోరియా హోటల్కు అర కిలోమీటరు దూరంలో ఈ హోటల్ ఉంటుంది. కళ్లు చెదిరే ఈతకొలను ఈ హోటల్ ప్రత్యేకం.
దిల్లీ క్యాపిటల్స్
దుబాయ్లోని 'ప్యాలెస్ డౌన్టౌన్'లో దిల్లీ జట్టు బస చేస్తోంది. ఇది బుర్జ్ ఖలీఫాకు సమీపంలోనే ఉంది. ప్రఖ్యాత దుబాయ్ ఫౌంటైన్ అందాలు ఈ హోటల్ నుంచి వీక్షించొచ్చు. చెన్నై జట్టు ఉంటున్న హోటల్ దీనికి దగ్గరే.
రాజస్థాన్ రాయల్స్
ప్రైవేటు బీచ్, పామ్ ఐలాండ్ మధ్య ప్రశాంతంగా ఉండే వన్ అండ్ ఓన్లీ 'ది పామ్ రెస్టారెంట్'లో గులాబీ జట్టు రాజస్థాన్ రాయల్స్కు వసతి ఏర్పాటు చేశారు. ఇదీ దుబాయ్లోనే ఉంది.
