ఐపీఎల్ 13వ సీజన్ ప్రారంభ మ్యాచ్ చెన్నై సూపర్ కింగ్స్, ముంబయి ఇండియన్స్ మధ్య జరగనుంది. ధోనీ నేతృత్వంలోని సీఎస్కే, రోహిత్ నేతృత్వంలోని ఎమ్ఐ తొలి మ్యాచ్లో తలపడనున్నాయి. ఈ విషయాన్ని బీసీసీఐ వర్గాలు తెలియజేశాయి. లీగ్కు సంబంధించిన పూర్తి షెడ్యూల్ సెప్టెంబరు 5న బోర్డు విడుదల చేస్తుందని వెల్లడించాయి.
ఇప్పటికే సీఎస్కేలో ఇద్దరు ఆటగాళ్లు సహా 13 మంది సిబ్బందికి కరోనా సోకడం వల్ల క్వారంటైన్లో ఉన్నారు. లీగ్ ప్రారంభం నాటికి వీరు పూర్తిగా కోలుకుంటారని బోర్డు భావిస్తోంది. ఈ నేపథ్యంలోనే సీఎస్కే, ఎమ్ఐ మధ్య తొలి మ్యాచ్ నిర్వహించాలని యోచిస్తోంది.
దుబాయ్ వేదికగా సెప్టెంబరు 19 నుంచి నవంబరు 10 వరకు ఈ మెగా లీగ్ జరగనుంది. అబుదాబి, షార్జా, దుబాయ్ వేదికల్లో మొత్తం 53 రోజుల పాటు ఈ టోర్నీ నిర్వహించనున్నారు. ఇప్పటికే యూఏఈకి చేరుకున్న జట్లన్నీ క్వారంటైన్ పూర్తిచేసుకుని ప్రాక్టీస్ సెషన్ను మొదలుపెట్టేశాయి.
ఇదీ చూడండి లంక ప్రీమియర్‌ లీగ్ షెడ్యూల్ ఖరారు
