టీమ్ఇండియా, ఆస్ట్రేలియా మధ్య ఈ ఏడాది డిసెంబరులో నాలుగు మ్యాచ్ల టెస్టు సిరీస్ ప్రారంభం కానుంది. ఈ పర్యటన కోసం ఆసీస్కు భారత జట్టు వచ్చిన తర్వాత వారిని రెండు వారాల పాటు నిర్బంధంలో ఉండమని కోరుతామని క్రికెట్ ఆస్ట్రేలియా తాత్కాలిక సీఈఓ నిక్ హాక్లే తెలిపాడు.
ఈ సిరీస్ను బయో సెక్యూర్ వాతావరణంలో నిర్వహించేందుకు వీలుగా అడిలైడ్ ఓవల్తో పాటు కొత్తగా నిర్మించిన హోటల్లో ఏర్పాట్లు చేస్తున్నామని హాక్లే వెల్లడించాడు. డిసెంబరు 4 నుంచి ప్రారంభం కానున్న టెస్టు సిరీస్లో భారత్, ఆస్ట్రేలియా తలపడనున్నాయి.
"క్రికెటర్లకు రెండు వారాల నిర్బంధం కోసం కచ్చితమైన ఏర్పాట్లు ఉండాలి. నిర్బంధ వాతావరణంలోనూ ఆటగాళ్లకు శిక్షణా సదుపాయాలు లభించేలా చూడాలి. దీంతో మ్యాచ్ల కోసం సన్నద్ధమవ్వడానికి వీలవుతుంది. అడిలైడ్ ఓవల్లో ఒక హోటల్ ఉంది. అందులో క్రికెటర్లకు సదుపాయాల ఏర్పాటుకు యోచిస్తున్నాం."
-నిక్ హాక్లే, క్రికెట్ ఆస్ట్రేలియా తాత్కాలిక సీఈఓ
"ఆస్ట్రేలియా పర్యటనకు భారత్ వచ్చే సమయానికి మా దేశంలో అంతర్జాతీయ ప్రయాణ ఆంక్షలు ఎత్తివేసే అవకాశం లేదు. కానీ, ఇక్కడ కరోనా టెస్ట్లు చేయడానికి పక్కా ప్రణాళికలు ఉన్నాయి. ప్రభుత్వ ఆదేశాల మేరకు నిర్బంధ ఏర్పాట్లు ఉంటాయి" అని హాక్లే తెలిపాడు.
కరోనా వైరస్ విజృంభిస్తున్న కారణంగా ఆస్ట్రేలియా వేదికగా ఈ ఏడాది అక్టోబరు 18 నుంచి నవంబరు 15 వరకు జరగాల్సిన టీ20 ప్రపంచకప్ను వాయిదా వేస్తున్నట్లు అంతర్జాతీయ క్రికెట్ మండలి (ఐసీసీ) సోమవారం ప్రకటించింది. ఈ ప్రకటనతో ఐపీఎల్ను నిర్వహించడానికి బీసీసీఐకి మార్గం సుగమమైంది.
